10種HR同事 總有一位Excel達人?

職場 17:40 2016/07/04

分享:

相片來源: HR小薯蓉

職場就如社會縮影,充斥不同性格的人。於人事部工作的博客「HR小薯蓉」撰文,形容在人事部工作的10種不同類型的員工,各位上班族又遇過嗎?

以下為全文:

1. 急口令神童

此類同事因為簽約次數太多太頻密或者太多interview要做,連講嘢嘅時間都要大大壓縮。聽佢講嘢幾乎要拎個電話出嚟錄音,replay幾次先聽到佢講乜。

特徵:說話速度快到可以由你左耳直穿右耳

2. 唯一男丁

人事部少男丁出晒名,佢地主要嘅職責係搬文件、換水同埋搬文件、換水。喺女性當道嘅HR,地位一般處於食物鏈嘅最底層,有冤無路訴。

特徵:經常(淨係)於換水時被稱讚靚仔

3. Photohunt高手

人事部文件唔錯得係理所當然,每個人事部總有一兩個高手,所有錯字錯格式都逃唔過佢對鷹眼,去機舖玩photohunt一定玩到天光都未輸。

特徵:發現3連錯combo會陰笑

4. 法律狂人

熟讀勞工法例,唔駛睇勞工署書仔都背得出法律條文。問佢一條問題會講幾個案例故仔畀你聽,屬於人力資源部的法律諮詢顧問。

特徵:唔制止佢會講唔停口

5. Excel之神

喺需要處理大量data嘅HR,部門裡總有個Excel之神。當你睇到佢用緊個excel就知自己平時有幾無知。喺錯縱複雜嘅formula當中你睇到神嘅偉大,慨嘆原來excel係咁神奇。神呀!教教我吧!

特徵:經常有人排隊問excel

6. 偽黑面神

平時唔講嘢個樣超正經,每次做interview都會擺起個款,嚴肅嘅樣子經常嚇親candidate,以為佢好鬼惡死。但一同佢傾閒計,你會發現佢係真·kai嘅。

特徵: 睇得下(唔出聲嘅話)

7. 傳說中的同事

呢位同事好似只係活係傳說當中,除咗朝早返工或者放工時間見到佢之外,個位大部分時間都冇人坐。傳說中佢地可能係做recruitment成日去見人,又或者係做training永遠都去咗上堂,又或者根本冇人知佢去咗邊...

特徵:披住隱形斗蓬嗰個

8. 三寸不爛之舌

為員工爭取福利喺人事部嘅天職,總有條三寸不爛之舌向各大商戶搲折扣、謀福利。但千祈唔好同佢過唔去,同佢嘈交你實冇運行,認輸啦。

特徵:超難應付

9. 自然自語怪

人事部同事每日工作好多時都要不停同唔同嘅人講嘢,呢種同事唔知係咪冇人同佢講嘢會周身唔聚財,又或只係太大壓力做到short咗,成日都會坐喺個位度自己同自己講嘢。你以為佢同人講緊嘢,但望過去鬼影都冇隻,又唔係講緊電話,原來係自己同自己傾緊計。

特徵:左手識同右手傾計

10. 長氣凶靈

開會最怕同佢一齊開,見人最怕同佢joint interview。特技係擴充句子,一句講完嘅事情往往會分廿句講,無限擴張開會嘅痛苦時空。佢每次做完interview你都會發現個candidate面青口唇白。如果同長氣凶靈開會,建議開會前飲少啲水食少啲嘢。

特徵:講嘢嗰陣人人都想打鑊佢

原文刊於「HR小薯蓉」Facebook,TOPick獲授權刊載。

撰文 : HR小薯蓉