媽媽的抉擇 小一揀校3大迷思

親子 16:05 2016/07/25

分享:

嫻姐最近好忙、好忙、好忙,文章更新速度太慢。忙咩? 話說皇帝仔明年9月升讀小一,今年9月已經要交「自行分配學位」的表格,淨係選校填表已經煩到我「R甩個頭」。為了選擇一間適合皇帝仔的學校,我已經頻繁地出席直資、私立及官津小學的簡介會,結果愈聽愈煩。

皇帝仔年紀還小,但一路以來選校、安排活動、每一步都要「左度右度」,都咪話唔苦。天使同魔鬼不停在腦中交戰,到底邊樣先對皇帝仔最好?

1. 母語教學 VS 兩文三語

近年「普教中」、「粵教中」講到風風火火,嫻姐當然有密切留意。以前用廣東話學中文,簡單易明又有親切感,當然想皇帝仔吸收得好一點、學好中文。母語都未講好,再學其他語言豈不是會「兩頭唔到岸」?

但現時提倡兩文三語,學唔好普通話會很輸蝕。況且現時小朋友已經不只學中英文,某間小學小學階段已經學兩文四語,簡直「一山還有一山高」!語言不是一時三刻就學得好,儘早開始學總好過發現自己落後......啩?

2. Happy School VS 催谷迎戰

嫻姐以前細個放學,做完功課就同隔離呀珍落公園玩到開飯,開心到不得了。人生幾十年流流長,當然想同皇帝仔報間Happy School等佢有開心的童年,最好就少考試少功課少測驗,有埋活動教學,等我地唔使日日陪太子讀書。政府都話啦,求學不是求分數!上堂開心投入,自然學得比較好。

邊個唔想仔女開開心心、無憂無慮呢,之不過交得學費當然想小朋友有幾多學幾多,唔揀間催谷的學校,太少功課考試容乜易競爭力大跌,升唔到Band 1英中?

依家好多學校都推行快樂學習,譬如黃大仙天虹小學,校長的教學理念的確深受家長歡迎,有家長一句「升中派位不理想」,立即KO晒家長們的熱情,呢個就是現實囉!

3. 自由發揮 VS 18般武藝樣樣精

早排皇帝仔學校舉行畢業典禮,嫻姐「有幸」見到其他同學仔的父母,家長們坐埋肯定會討論仔女事,平時鮮有現身的我就被追問:「你個仔讀緊咩興趣班啊?」我向來奉行愉快學習,平日讀書做功課已經夠辛苦,放假肯定去親親大自然,興趣班當然是興趣先行,真心喜歡才會報讀。嗱!沙田區某直資名小學校長都話:「學生最緊要有陽光氣息!」

我如實講出皇帝仔靈興趣班後,立即在其他家長變成「異類」,朱太話她已經幫寶貝女報讀了N個暑假預備班,游泳、鋼琴、西洋畫同跆拳道,多到我都唔記得,甚至有家長寸我:「你唔係真係信D校長講十八般武藝無用嘛,無翻幾項傍身,肯定無學校會收囉」。

嫻姐諗落,又怕皇帝仔會「輸在起跑綫」,宜家考學校要準備portfolio列出成績同威水史,報考某深水埗名牌小學更要過三關,先見個仔後見家長、最後一齊見校長,難度真係可媲美考AO、EO。唔讀多幾個興趣班,搵咩填咩落Portfolio?

要選間我心儀的學校?還是選間適合子女的學校?呢個矛盾,我實在很困惑!

文章獲都市嫻情授權轉載。

【其他熱話】

免費幼教懶人包 你交少幾多學費?

龍媽自製龍校幼稚園升小攻略

3歲女孩剖白:點解要讀兩間幼稚園?

子女要贏 你就要贏在求偶時!

撰文 : 都市嫻情