3種面試「低手」答法 interview 即時玩完

職場 17:15 2016/07/20

分享:

面試場景不是盡訴心中情,曾遇過面試者講述如何懷才不遇而深深不忿,亦見過有人說到心酸處而流淚。經常問年輕人,面試目標為何?都說︰「希望人家喜歡我」或「令人對我留下好印象」。

目標錯晒,你估人家只見你一個? 尤其大機構,面試者排長龍,若只把目標設在「令人覺得我唔錯」,咁想成功都幾難咯!

去得面試,應以顯示自己乃芸芸面試者中最好或最適合的應徴者為目標。有此思維,就不會把焦點放在如何講自己,而是要準備如何呈現自己的獨特出眾處。首先,面試切忌自我中心,以下是真人真事例子︰ 

問題1︰為甚麼你想加入我們公司?

如果你答︰「我想學多點東西」、「累積多點經驗」…… 以為咁答實「無死」、可以顯示有上進心嘅話,咁就弊傢伙。你有否從僱主立場想想︰「吓?我個個月出糧俾你嚟學嘢同累積經驗?有無諗過我呀?﹗」

聽過更搲頭嘅答法︰「因為我很急需一份工!」坦白到連修飾都費事,因「我需要一份工」故「你公司應請我」是甚麼邏輯?莫非當人社會福利署乎?

問題2︰你為甚麼之前轉過幾次工?

如果你答︰「噢, 我個人好易覺悶」、「我嗰個波士好無能」、「同啲同事夾唔到」……咁答法,有人請才怪。

這問題頗普遍,真的轉過幾次工的面試者可參考此方向︰「以前較年輕希望嘗試不同工作,讓我可以肯定自己該往哪方向發展。經多方嘗試,最後落實這行業最適合我,而我又能發揮得最好 (舉實例支持)。因此,我申請這份工作。」

問題3︰你有甚麼長處?

如果你答︰「我無乜長處」、「我鍾意搞笑」、「我對顧客講大話時,都能保持誠懇樣子」……咁你就徹底完了,哪個僱主還有勇氣請你?

這通常是臨完場的例牌問題,要提出三至四項你的長處可以跟應徵的工作有關連的,並加以證明。參考答法︰「我對細節特別留神,曾在現時公司發現幾次重要錯誤,避免了危機。從那時起,他們就要求我作最後檢察,而我當然樂於承擔。另外,我辦事效率高,一定能在上司限定時間內完成工作……」長處每人不同, 必須在面試前,認真思考和發掘。 

面試怪談愈講愈有,最近就有某大企業,遇上剛大學畢業應徵者帶埋阿媽面試,唔止咁,嗰位阿媽竟要求一齊入面試室「旁聽」並「保證唔會出聲」。 

【其他熱話】最討厭4種扮晒嘢同事

【其他熱話】同事刁難 職場新人如何化解?

【其他熱話】利嘉敏:高官們應該學習的5招傍身術

 

撰文 : 利嘉敏

欄名 : 攻關女子