孫立民:第一屆向老闆道歉比賽

City 13:51 2016/07/25

分享:

相片來源:iStock

最近網上流行「道歉比賽」,如果職場上有道歉比賽會怎樣?盈力僱員服務顧問首席顧問孫立民認為,如果打工仔向老闆道歉,可能會是這樣:

參賽者:David,sell屎 

老闆,我尋晚OT到10點,實在太肚餓,血糖急降,有點心虛虛,腳浮浮,於是拿了包牛肉乾狂噬,但食完至發覺是過了期兩年的,還見到一張紙條,指明是給總經理吃的。

真抱歉,吃了你的東西。仲有,今朝要攞sick leave 去睇醫生!

參賽者:英姐,清潔工

經過多日的良心責備,我決定自首,呢個星期我攞左兩卷廁紙,係洗手間撳左半樽皂液番屋企,仲拿走3枝原子筆2卷膠紙一個釘書機同20張A4紙俾阿仔做功課,私下keep住用完的HP printer ink 同toner,交回給供應商換領超市禮卷,應該係咁多。

其實你已經依足法例,俾32個半一粒鐘我,一個月有成6500蚊,20分鐘嘅lunch time又肯俾我地用嚟食飯,我應該十分感激,對公司忠心耿耿才對,點知我喪盡天良,做埋呢啲有違公司利益的事情,真係唔係人!

參賽者:Jennifer,秘書

老闆,今朝有位女士打電話來找你,聲音有點沙唖,我話你去左上海開會,她說上海?唔係台灣咩?我話唔係台灣,係上海,因係我買機票的,該名女士說唔該晒你Jennifer,跟著收了線。

佢點知我個名?我心諗,大鑊,我記你昨天向我提起你太太最近傷風感冒喉嚨痛。老闆,真的對不起!

參賽者:Karen,文員

老闆,我最近係網上見到一篇文章,題目是十句不能向老闆說的話:

呢啲嘢唔關我事喎
你上次唔係咁講
我唔識做
哎呀我無諗過添
呢單野無可能做到
其他人夠遲交啦
呢次大鑊
點做個客都會投訴架啦
我都係跟你指示去做個喎
sorry囉

我發現我除左第2句冇講過之外(我果時係說:「你今朝唔係咁講」),其他都講過晒,老…..老…..老闆,真係sorry囉!

參賽者:阿姿,市務部經理

老闆,我對你唔住,我犯了滔天大罪,我冒你簽cheque,私吞左五百萬,又將新到倉果批過千萬元紅酒當老鼠貨買出,套現左二百粒,仲有,夾萬果五十萬現金我都擸埋,還有,我拔掉了雪藏凍肉雪櫃嘅插蘇……。

老闆,你放心,這些事情其實沒有發生,不過,上次我買晒機票訂晒酒店,但你最後都唔批我放假,這是我諗過要做的事情清單。

參賽者:阿強,顧客服務主任

老闆,有件事要同你講番。有一日門市有個客攞部千二蚊黑米手機回來,投訴說部機好慢,要求退回貨款。我怒啤左佢一眼,跟著向他說:

先生,令你感到不便同唔開心,真係唔好意思,我代表公司向你致歉。

不過,公司規定,貨物出門,不能退番現金,其實你可以攞部機去黑米果度維修,新機有一年免費保養。

個男人跟住用左廿六個字嘅粗口向我及全家及上兩代問好。跟住我拍了一下枱面,跟住你出來鋪面按著我膊頭,細細聲同我講顧客永遠是對的,聽粗口是人工包埋的,要令個客有愉快的顧客經歷。跟住你返番入去,跟住我同個客講:

先生,對不起,係我地唔啱,我地會退番千二蚊俾你,為左表示我地嘅歉意,我地仲送你一部iphone 6 plus 128GB俾你,加埋隻42毫米太空黑不鏽鋼錶殼iwatch,希望你有愉快的顧客經歷!

老闆,這是我最後一天在公司上班,對不起!

各位若遇到職場管理、辦公室政治、人際衝突、或前途抉擇等難題,歡迎留言提出。筆者會詳盡分析和解答,亦可瀏覽盈力僱員服務顧問網頁

其他熱話:

孫立民:職場嬲嬲 人際出事位大起底

孫立民:職場主管兩種人 魔鬼VS天使邊種work?

撰文 : 孫立民 盈力僱員服務顧問首席顧問