Pokémon GO 中毒計分表　毒L出嚟啦！

Pokémon GO登陸香港後，令全港陷入捉精靈熱潮，究竟你有無Pokémon GO 成癮？不用拗，計分最實際，以下「精靈訓練員」特徵你中幾多項？

1. 萬般帶不走　唯有尿袋隨身

往常每晚臨瞓前把 iPhone 充滿電，已足夠翌日用一整天，但自從墜入Pokémon GO 的無間地獄，電池就好似倒水一樣急劇下跌，2小時已經極速乾塘。

往往在電話快要無電時，你卻遇上出現機率只有4%的水箭龜，「頂住呀！」你對住iPhone 電池大叫，語音未落電話芒變成黑色一片，此刻你心情同樣一片暗灰，「唔通連個天都唔鍾意我...」

自此，你可以不記得帶銀包、可以不記得帶屋企鎖匙，但你不會不記得帶手機及尿袋...

【延伸閱讀】Pokémon GO 耗電量實測　2小時電量幾乎「乾塘」

2. 長期變身「低頭族」　過馬路唔睇車

正所謂馬路如虎口，但小智上身的你只管做低頭族，過馬路時都很想捕捉牠。明明綠燈轉眼變成紅燈都察覺不到，只管不停摔芒拋出精靈球，「睇車呀！掛住玩！」面對住怒髮沖冠的司機大佬，你只會傻笑。

不過奉勸各位，過馬路一定要留意路面情況，重要事情講3次，行路時玩少一陣吧！

3. 開會無視腦細　枱底捉精靈

會議日日都開，卡比獸絕對不會日日遇到。手機彈出遇到小精靈的提示，你漠視正在會上發表偉論的腦細，拿出手機暗暗進行「枱底活動」！

「嘩！卡比獸呀！」見到這隻「神級」小精靈你忍唔住嘰嘰笑。此時眼光凌利的腦細已經注意到你的「枱底活動」，作為專業的精靈訓練員，腦細黑面？So What ？

【延伸閱讀】Pokémon GO 癱瘓辦公室 你屬於哪種人？

4. 日日快扒頹飯　捉得一隻得一隻

每日Lunch 是一眾上班族的透氣時間，「唔食飽飯又點有力氣捕捉卡比獸呢？」以前每日為食西餐還是中餐、泰國菜還是越南菜而煩惱不已，現在只有一個原則：「快」，寧願到公司樓下的茶餐廳快食一個頹飯，埋單後頭也不回奔向最近PokeStop，只為了成功爭取多10分鐘，繼續升level。

5. 凌晨不歸家佔領公園

日日OT的上班族放工後只想宅在家，攤在床上食零食、睇電視，睡前公園散步做運動，傻的嗎？

自從下載Pokémon GO 後，佔領公園正式啟動！及至凌晨12點仍然有數十人不願離去，只為捉得一隻得一隻。

6. 毋懼蚊蠓　駐守Pokestop 刷Level

夏天為大地帶來蚊、蠓，在Pokestop附近站10分鐘已經一腳紅點，但精靈訓練員依然愈痕愈愛。

Pokestop櫻花正開，訓練員又點肯離開？不過堅持同收獲未必會成為正比，一腳紅點換來可能只是50隻大口蝠。

【延伸閱讀】Pokémon GO 位置逐個捉　政總是精靈球補給站？

7. 女神假日不拍拖　尋找比卡超

往常為了計劃假日與女神拍拖節目，花盡心思、絞盡腦汁，女神都不會欣賞，但今個周末女神竟然主動諗節目！

「不如帶我去捉護主犬」、「九尾好得意，係邊到有得捉？」女神難得諗節目，即時上網尋找稀有小精靈的出沒位置！

【延伸閱讀】Pokémon GO 稀有小精靈出沒 邊隻最難捉？

8. 開口埋口「小精靈」、「CP值」

為了成為出色的精靈訓練員，你無時無刻都上網找Pokémon GO 資料。究竟邊隻小精靈CP最高？究竟夢夢幾時出現？究竟如何升Level 最快？你每日的話題都離不開Pokémon GO ，你已經完全中毒...

9. 毒L出門口　交際指數急升

歌都有得唱「I Love Pokemon，認定你是朋友」，醉心動漫的你終於活動範圍不止家中，你走出冷氣房，不再「三步不出家門」，不怕34度的火爐高溫只為捕捉小精靈。

你社交能力指數亦突然急升，往常打招呼都要「er...er...你...你好，我叫...」現時自信心大增，因為你知道稀有小精靈出沒位置，女神問「點解我捉極都捉唔到比卡超」你都可以即時解答！

10. 離開地球表面　香港新聞一概不知

自Pokémon GO 推出以來，這3天香港的其他事你都一概不知，新聞、報紙無望過一眼。不過不要緊，因為不少香港人與你一樣，連報紙、新聞的內容一半以上都是「Pokémon GO 」...

是時候計分了，究竟你有無中毒？一睇就知：

一項都唔中：

你這3天以來已經與社會脫節，同枱食飯的朋友同事都在談及Pokémon GO，但你一句都搭不上咀，你只覺得好煩，好想問「究竟幾時先玩完？」

中1至3項：

你輕微中毒，但懂得分配時間。你可能對「寵物小精靈」沒太大興趣，純粹下載遊戲試玩，湊湊熱鬧。

中4至6項：

你中度中毒，不過仍知道節制，未達沉迷程度。可能待熱潮過後，你亦會跟隨大家一樣「棄Game」。

中7至10項：

恭喜你！你已經小智上身，100%成為「精靈訓練員」，你本身已經喜愛《寵物小精靈》，這套動畫亦是你的兒時回憶。希望你早日捉齊所有小精靈！