莊偉忠:苦中作樂 快樂總好過哀愁

職場 10:52 2016/10/07

分享:

老媽子講,我細細個上契齊天大聖保平安,或者因為咁,特別鍾意運動,好少病痛,偶然唔舒服,都覺得小病是福。

92年,陪老竇去診所檢完查,隨口噏:「小腹痛咗幾日。」醫生吩咐瞓上床,左撳右撳,「你老竇走得,你唔走得,慢性盲腸炎,隨時變腹膜炎,即刻去做切割手術。」留院期間,撞正歐國杯外圍賽,屋企人攞咗架小型手提電視機,夜晚睇直播,日頭招呼絡繹不絕嘅親朋戚友,又有老婆餵食粥,完全唔使郁。爽,小病是福。

【延伸閱讀】你見我有幾「幸運」 我就有幾「努力」

98年,足球比賽中,畀個波兜口兜面省中,雙手掩面倒地,隊友檢查傷勢,大叫:血呀。擘開雙眼,一片白濛濛,乜都睇唔到。去到醫院,醫生植入矽膠,填補視網膜裂縫,瞳孔撕裂就救唔番,從此伸縮不靈。畀老婆徹底問候完,咪又係噓寒問暖,照顧周到,乜都唔使做,半個傷殘人士,地鐵有人讓座。爽,小病是福。

今趟心臟病發,除咗心重傷,死咗啲無得復元嘅細胞,裝咗幾件支架,終生食藥之外,頭尾不過四日,傷口得個小窿,無劇痛,無不便,仲有成村人關心。諗起休養期內,唔使洗碗吸塵晾衫,無人再叫我跑馬拉松啦,第時見到老婆想鬧我,只要揞住心口,皺埋眉頭,大人肯定收口。超爽,小病是福。

【延伸閱讀】35歲以前要懂的4個管理堂課

乜嘢係小病?取決於積極正面樂觀心態,呢幾樣品性,我都有;明知改變唔到事實,不如接受;既然接受,不如苦中作樂,快樂總好過哀愁。

「老婆,小病是福,口淡淡想食橙。」

「好番,小你個頭,去幫我搣個橙。」

【其他熱話】Send錯email 變關公? 秒速收回Email大法!

【其他熱話】黃喉不是氣管 豬橫脷是豬的哪個部分?

【其他熱話】長女棄傳統名校轉讀國際學校 梁錦松:求學不是求分數

全文刊於《晴報》

晴報facebook

標題經TOPick修改,原題為「小病是福」。

撰文 : 莊偉忠