南港島「搵食」攻略 利東街市食$28巨燒雞髀【有片】

休閒 18:06 2016/12/15

分享:

隨著港鐵南港島線即將通車,香港仔、鴨脷洲一帶的舊屋邨街市開始轉型。最新大轉型的便是位於鴨脷洲利東站出口的利東邨街市,劃出大半面積來變身做海鮮食街,暫時進駐的店舖有日式串燒、蒸飯點心、重慶辣粉、海南雞飯、炒雪糕蛋卷,睇落都好吸引架!

要知這條新食街要幾吸引,先睇片:

1. 拳頭咁大鮑魚 唔使二百

大大隻南非鮮鮑,可揀又燒又刺身兩食,正。(陳智良攝)

 

全部串燒即叫即燒,師傅都好有功架。(陳智良攝)

一入海鮮街就會見到這間串燒功坊,當日老闆在街市海鮮檔搜購回來的海鮮全數放燒爐隔離,客人可以透著玻璃揀海鮮和各式肉類、香腸、蔬菜。

但最吸睛的一定是每日限量的南非鮑魚,成隻拳頭咁大,用手指摸摸群邊仍在蠕動,新鮮到一個點,可以燒或刺身,也可揀兩食,價錢都只是 $180,抵到呢。老闆話益下街坊囉!至緊要食得開心!

各式串燒每串數量不少,認真抵食!(陳智良攝)

大大塊燒雞髀,一般大賣$18,另有超大件售$28,抵食。(陳智良攝)

餐牌上的海鮮類款式多,包括有帶子、青口、蟶子、海蝦、鱔等,雖說因應時價,但有約價展示,讓客人有預算。而肉類方面選擇也不少,豬、牛、羊、雞都有,最抵食的一定是超巨雞髀,體積足足有手掌大,亦只是 $28,一般吃日式串燒都要計著數的,來這裏便不用再左計右計了。

【延伸閱讀】香港仔夜遊街渡睇燈飾 超浪漫夠特色【有片】

2. 熱爆碟頭海南雞飯 有雞腎送

海南雞飯連湯套餐$38,碟頭大。(陳智良攝)

街坊生意最緊要平靚正,這間星洲海南雞飯($38),完全符合要求。

黃薑油飯成座山高,好彩的話,更有雞髀位,最得吃雞人歡心的是有鹽焗雞腎和雞腳附送,坊間雞飯店少有。

老闆話開張那幾天都預了約 100 隻雞,都賣清光。他說一隻能做到 5-6 碟飯,即可以日賣 500-600 碟海南雞飯,小店來說都算厲害,例湯又天天轉款,當天就煲了菜乾陳腎豬骨湯,配合時令。

3. 泰式炒雪糕蛋卷  迷倒少女系

雪糕漿放於攝氏零下 30 度的鐵板上快炒,炒雪糕會捲起成蛋卷狀,質地煙韌,味道酸酸的,好 fresh。(陳智良攝)

【延伸閱讀】南港島線通車 屋邨明渠變新潮商業區【圖輯】  

別以為炒雪糕已經無新意,睇清楚這間是泰式炒雪糕($30),是由老闆阿鬼去年在泰國學師回來,今年已在美食展亮相,反應奇佳兼上過《東張西望》訪問。

他說現在曼谷勁hit,把雪糕炒到剛好軟的最佳狀態,然後快手捲成蛋卷狀,配上各式脆脆、爆炸糖、Oreo 餅碎來吃,賣相吸引,而且還是猛男來炒,整件事來得特別有型。

老闆還對品牌有要求,他謂千挑萬揀了一隻新西蘭的雪糕品牌,因愛其質感好,用來炒,特別的企身,而且味道亦佳。少女系當然會揀士多啤梨,其他有朱古力、抹茶、芒果等大路口味。

有型老闆炒雪糕,少女系受落。(陳智良攝)

暫時已開業的食店有主打重慶酸辣粉夾港式茶檔的重慶姐姐、老少咸宜的蒸飯點心的包點師傅和東記車仔麵,比起選特首,實在是相當有得揀了。

另一食肆包點師傅,推出的點心精緻,估不到街市點心店都如此講究賣相,比個like。(陳智良攝)

另一食肆重慶姐姐的酸辣粉一向受歡迎($26)。(陳智良攝)

利東海鮮食街

  • 地址:利東邨利東街市內(近利東站港鐵)
  • 營業時間:7am-12mn 

【其他熱話】聖誕特色親子派對 $420享室內滑雪樂

【其他熱話】香港大學站40分鐘郊遊徑 尋幽探訪龍虎山隱秘草地【有片】

【其他熱話】工展會必掃熟食攻略 一呎長熱狗夠震撼

撰文 : 趙景隆 TOPick 記者