給20歲大學生的10個忠告

職場 13:34 2017/01/05

分享:

(相片來源:iStock)

每逢新年,全世界的人都鍾意係Facebook回顧自己過去一年的精華片段與領悟,又會寫下來年的New Year Resolution:從認真讀書到減肥都有。香港這個地方話大唔大,話細唔細。700萬人,無論係家住半山的人生勝利組,或係需要還Grant Loan的霉友,一樣各自有著自己的人生故事,有著自己的夢想與追求。

20歲的香港人,大部分在大學或大專院校。大學對於99%的人,係人生最美好的青春歲月:Your whole life is ahead of you. 所有對人生的夢想與憧憬,在那幾年都看似非常 achievable。尤其在畢業出社會後回看,更覺得只能以Surreal來形容那疑幻似真的幾年。

大部分人進入社會後,大學的美夢慢慢被遺忘,光環亦逐漸褪色。哪怕你是4年來出入薄扶林大學的天子門生,無人保證你30歲可以月入3萬 (not that 這是個非常respectable的收入水平)。

而且,絕大部分20歲的人都沒有得到真正有用的guidance: 教授們 do not give a shit,父母亦無暇及無Insight給予有用的引導。結果,他們最終只能將命運歸託運氣,像大富翁一個大問號的「機會卡」,然後在商業社會流離浪蕩,隨波逐流。

好好領略SJ的以下10項忠告,希望可以幫你省回很多冤枉路,更大機會達成自己的夢想 (whatever that dream is)。

1. 讀書唔保證事業成功

進入大學前的公開試,從以前的 A-Level到而家的DSE,將你的人生推向「一試定終身」的信仰的高峰。對於16,17歲的人而言,操練Pastpaper考好DSE就是人生的一切,決定你將來食粥定食飯,開法拉利定開Gogovan。

然而,起碼對已經入讀大學的人而言,20歲就係要重新思考呢一個問題的年齡。不要迷信讀書就保證成功,因為 you need way more than a degree to succeed.

2. 但唔讀書 幾乎保證失敗:要學李嘉誠「搶學問」

正如以上所講,讀書唔一定成功。但可以肯定地講,唔肯讀書的人,就一定會失敗。

呢度講 「唔肯讀書」並不局限於大學裏面的課程,而更廣泛地指「睇書」及追求知識。

唔知有幾多人睇過,李嘉誠係一個港台RTHK人物專訪紀錄片,講過自己父親係教書先生,但戰亂中自己無機會讀書,來到香港打工及創業初期,有段時期自己係好驕傲,因為自己比身邊同齡人努力非常多:

人家話求學問,自己係『搶 』既

 20歲的你,無論你將來想做banker定創業賣撈麵,一定一定要有呢個李嘉誠「搶學問」的心態。

假如你決定做撈麵:

從研究撈麵從撈麵的歷史文化 (呢種食法好似係來自嶺南的苦力階層? ),到各種麵條的特性,水的酸鹼度,炸醬的每種原料等等,必須有德國人的「工匠精神」及日本人的「 Kaizen Mind」,才能製造出力求完美,user experience 100分的產品。

最差的心態就係因為唔中意讀書,只中意打Candy Crush,求其搵樣野做而問老豆借100萬去開檔賣撈麵,因為覺得「好似幾好賺,有得做」。呢種人,做任何野都只看利益,不肯付出辛勞去研究到底,永遠都在追求一個不存在的美夢,結果做乜都必定失敗。

20歲的大學時期,培養呢種「搶學問」的心態,將會係你大學唯一最valuable的得著。

3. 練好英文 加多一門興趣外語(optional)

睇下香港的高官子女,全部都係英美留學,個個英文都接近Native程度。就知道,無論你將來做乜都好,英文係有幾咁重要。

大學時期,相對將來工作,其實係非常空閒,起碼有暑假呢樣野。假如對某個國家的文化特別感興趣,就應該好好把握大學4年學埋呢個國家的語言。未必係有任何直接得著,但你以後去旅行都會好好玩。

例如,識日文去日本旅行的樂趣,係其他人永遠不能明白的。

4. For God’s sake,唔好浪費時間買股票

假如你志不在金融行業,則唔好浪費時間買股票。

第一個原因係人都知,就係玩股票贏少輸多。

第二個係除非你已經有第一桶金 (例如起碼少少100萬以上disposable assets),否則即使有6% annual return也是徒然。除非你的Niche正是股票投資,你自命是下一個巴菲特,否則研究股票只是一個 major distraction + waste of time.

第三亦係更重要的原因,就係20歲買股票,容易令你變得庸俗而且追求捷徑。大學生買股票,假如好運,贏左一萬幾千,容易飄飄然自覺係少年股神,開口埋口講 PE, PB 同美國加息,呢種人無論在大學或在社會,往往最黑人憎。假如剛巧你Y1 Y2是牛市,的確你可以借錢買股票,2年賺幾十萬唔係唔可能,但呢幾十萬的代價,可能就係失去了追求人生更偉大夢想的機會。

5. 尋找自己的Niche

SJ之前已經有篇文講過,人生最重要就是找到自己的Niche。

20歲人,要找到自己的Niche,其實依然時間尚早,需知道即使係「一死以謝天華」的Laughing哥,也去到40歲後才從一個綠葉角色成為天王巨星,找到Laughing哥這個角色的Niche。

但是,正如追求任何事情一樣,越早開始,越早完成。因此,越早開始尋找自己的Niche,其實越快會找到。最理想當然係大學畢業已經立即找到自己的Niche,在自己的職位如魚得水地工作,一畢業就像飛機降落時的輪胎般「hit the ground running」,立即發光發亮。

6. 有得去Exchange 一定去

咩國際視野果d就已經眾所週知,無需再花時間解釋。更重要的係一定要make the most of it:了解同融入當地文化 ,多出遊,不要只顧讀書,但也不要爛grade,一定要好好珍惜在外國的時間work hard play hard。

7. 有得去外國果批 預早考慮定居問題

SJ文章《留學生讀完書返香港之嚴重失落感》講過,留學生回流很多時發現係香港工作同生活,原來不是想像中好,後悔當初無留係當地工作定居。對20歲的留學生而言,呢個其實係人生其中一個最最最重要的問題,假如作出一個輕率偶然的決定,下半生很可能從此改寫,將來後悔又只會悔不當初。

8. 結識志同道合的朋友

又正如之前SJ文章《人生找到自己圈子如此重要》講過,人找到自己識英雄重英雄的圈子,總是如魚得水。

20歲的大學時期,更應該開始selectively地結交朋友,志同道合大家互相勉勵交流,比起一大堆無謂的酒肉朋友,長遠來說會有更巨大的無形及有形價值。近朱者赤,近墨者黑就是這個道理。

9. 唔好墮入消費陷阱

絕大部分人第一張信用卡,就係大學時果張恆生Enjoy卡。雖然得果幾千蚊簽賬額,但好多人的病態消費就係呢一張卡開始。 入到大學,同中學好唔同,你會發現圈子突然大左非常多,其中點都會有二世祖富X代,非常大花筒,買名牌開跑車。人一墮入這種消費病態,就係將來財務失敗的禍根。即使你將來月入10萬,但你月花費11萬,一樣搞唔掂。

10. 明白「時間就是金錢」這個道理

唔好搞錯,「時間就是金錢」唔係出入搭的士的藉口。更重要的是20歲人,容易有種錯覺係自己大把時間。正如陳奕迅首陀飛輪,「過去十八歲,沒戴錶不過有時間,夠我沒有後顧野性貪玩。霎眼廿七歲,時日無多方不敢偷懶,宏願縱未了,奮鬥總不太晚。」

唔係嚇你,in the blink of an eye,你就接近30歲啦。時間過去,就唔會返回頭,係咪要更加珍惜今日呢?

SJ結語

最後,by all means have fun!

20歲肯定是人生快樂指數最高的巔峰時期,老老實實好多人在大學這「高峰的快感 剎那失陷」,之後一世人都無辦法recover過來。以上咁多條忠告,其實就係希望將來都可以再創人生高峰,而不用永遠都係懷念大學的快樂歲月。

但點都好,即使你將來大成功,其實都會懷緬大學時期簡簡單單,無憂無慮的青蔥歲月。

20歲,搏盡無悔以外,也要好好細味這幾年的快樂。

原文轉載自StealJobs.com。StealJobs全面透露各行各業人工,工時,晉升前景,以及入行攻略,歡迎匿名提供收入資料。

【其他熱話】醫療輔助隊2.2萬元筍工 1分鐘要做12下sit up

【其他熱話】有案底還可做醫生?醫科生VS醫生命運大不同

【其他熱話】日睡8小時非黃金標準 醫生拆解睡眠4大迷思