鄭丹瑞:打工仔不同命運

職場 16:01 2017/02/09

分享:

「喺我公司,有幾個後生仔等緊上位。」好事之徒在述說一個關於他公司的故事。「我哋全公司班老嘢,都睇好其中一個十分搏命,凡事親力親為、落手落腳嘅後生仔。結果,老細柯打落嚟,全公司眼鏡跌到一地都係,因為老細升咗另外一個毫不起眼嘅後生仔做主管。

大家都想知道發生乜嘢事?於是推舉我去搵老細摸下酒杯底,了解下老細嘅心態。除咗因為我同老細比較熟,更加因為我有名大家叫:好事之徒!我亦當仁不讓,大膽推門入老細房,單刀直入,問佢為何會揀一個如此冷門嘅人做主管?

「哈,老細淡然回答我:因為頂頭大熱嗰個年輕人,凡事太過hands-on,完全唔信佢身邊嘅人,覺得身邊嘅人無一個及得上佢,佢嘅工作態度係:有功自己去攞晒彩,出咗事就怪責班下屬唔夠佢叻,咁樣嘅人,只適合做執行者,佢永遠唔可以做一個先行者,因為佢帶動唔起士氣,一個人,得一雙手,可以做到幾多嘢呢?

至於呢個你哋話佢冷門、冷手執個熱煎堆嘅年輕人,佢好唔同,凡事識得下放權力,叫班手下幫佢做,做得掂一齊領功,衰咗佢就出頭幫下屬孭咗個鑊,所以班下屬個個願意幫佢搏命。老細人生閱歷豐富,睇人果然有與別不同嘅眼光;升咗呢個後生仔之後,業績果然年年向上升。我服。」

打工仔往往拼盡所能,到頭來仍未能獲上司賞識,好事之徒公司這兩個在工作態度上南轅北轍的年輕人的遭遇,可能是一個借鏡。

【其他熱話】鄭丹瑞:只講不做的人

【其他熱話】各行業人工Checklist 打工仔有無underpaid?

撰文 : 鄭丹瑞