平民價錢打邊爐 我在海底撈享受帝王服務

精明消費 13:07 2017/02/16

分享:

(相片來源:海底撈火鍋台灣)

聽聞海底撈火鍋即將落戶香港,Facebook post一出,港女朋友就即刻Tag港女gogogo。雖然港女對返大陸食飯甚為抗拒,不過凡事總有例外,港女自從早前被幾個朋友「夾」返深圳食海底撈,居然心思思想再食。點解?並非只因食物好味,而是幾百蚊就可以換來帝王級的享受。

上次港女同朋友上深圳,朋友推介食海底撈,雖然知道海底撈其實是火鍋店,但港女一向不太喜歡火鍋,亦不覺得同香港的火鍋店有何分別。不過既然大家都想食,偶爾一餐半餐也無妨。

深圳的分店24小時營業,對收工先北上的港人而言的確很方便。由於沒有訂枱唯有排隊,一向沒有耐性的港女每次一聽到「等位」就即刻想轉場,不過以「變態的服務」聞名的海底撈不但沒有令港女轉身就走,反而嫌等位時間過得太快。

等位等到肚餓,海底撈有餐前小食區供等位的客人任食任飲,基本上有水果、爆谷、糖、上次甚至有Häagen-Dazs雪糕,亦不時有侍應送上飲品茶水,未入座已經先食飽,食完唔繼續等位,都唔會問你收錢。咁好服侍,港女當然繼續等。等到悶,海底撈連Board Game都有提供,一路等位一路玩,時間自然過得快。

稱得上變態服務,固然有貼心又貼身的服務。等位時已經見到有皮鞋男士在享受擦鞋服務,又有按摩椅坐鬆下筋骨。最令港女意外的是,海底撈還提供美甲服務,咪以為免費服務求求其其,美甲師連彩繪都畫得到,雖然不知道火鍋店與修甲擦鞋有何關係,不過確實沒有一間火鍋店能夠提供如此周到的服務,令港女反而受寵若驚。

等了大約1.5小時終於入座,一入座侍應隨即準備髮圈給在座的長髮女士,以免頭髮掃在食物上,亦有圍裙可供使用,有外套的話會幫客人套好,以免外套沾上味道。而亦為免手機被湯、油濺到,連透明手機套都準備好,把顧客的全身上下都照顧好。

(相片來源:海底撈火鍋台灣)

由於同行的一個媽媽級朋友帶同囡囡過來,侍應不是安排BB凳,而是把BB床推出來安置小朋友,店內亦有小朋友的遊戲室,食到一半囡囡想玩,朋友就氹囡囡去遊戲室玩。

落單後食物很快就送到,正當港女想動手去淥蝦淥肥牛時,侍應已經開始幫港女淥,將蝦撈上來時侍應甚至幫手剥蝦殼,由落單到有得食,港女全程不用動手,簡直是食「殘廢餐」。用餐途中,拉麵師傅會走出來即席表演拉拉麵,又有四川變臉表演,有得食又有Show睇。

(相片來源:海底撈火鍋台灣)

雖然不是火鍋放題任食,而是逐盤火鍋料收費,港女很喜歡落單時食物份量可選擇一份或半份,就算眼闊肚窄叫完食唔落,只要未掂過,亦可免費退回去,不用擔心浪費食物。

當然連去洗手間都有人服侍,侍應全程帶路,去完洗手間,有侍應會幫手開水喉遞紙巾遞Hand cream。而護理用品亦一應俱全,衛生巾、香水、洗臉乳等通通有提供,有需要時可用店內提供的牙刷刷牙,以免食完麻辣火鍋口氣大。

埋單計數,港女一行人平均每人200元人民幣,與香港火鍋任食的價錢差唔多。收費合理,而又有帝王級的享受(雖然服務周到得叫港女都覺得唔好意思),難怪海底撈長期大排長龍。

在香港開張後能否保持同一樣的水準就好難講,不過食過一次,真係會番尋味。

原文刊於「我係真港女」Facebook專頁,獲作者授權轉載。

【其他熱話】潤膚乳愈搽愈痕 認住4款不含致敏成分潤膚乳

【其他熱話】無綫真人騷《有樓萬事足》 拜金港女:無樓就唔好白撞!

【其他熱話】中大現雪景 紅外線攝影影出粉紅櫻花海

【其他熱話】狼人Hugh Jackman力抗皮膚癌 6度復發:記得搽防曬