孫立民:Mall 姐級上司你遇過未?

職場 11:04 2017/05/11

分享:

《不懂撒嬌的女人》中的Mall 姐,橫行職場,要表現,唔過電,自己係工作狂,同事要陪葬,24小時on call。《志明與春嬌》話一生總會愛上幾個人渣,我就話職場流流長,總會遇上幾個Mall姐或惡頂老闆。

1. 燥狂hurt人型

搵伙記出火hurt到變灰燼!老闆鬧伙記,唔算Mall姐,出得嚟行,預咗。如果堅係自己揩野,更要企定受。但惡頂的是搵下屬當發洩出火對象,鬧到釋迦牟尼都會皺眉。運用Ben sir粗口鬧伙記只是入門版,以下的你堅想會買兇殺佢:

你喺度做左十年,我覺得入職左兩個月個新同事做得好過你一萬倍囉!

我求你以後唔好咁勤力,你愈勤力公司損失愈大,你明唔明呀!

你真係有考過DSE?

2. 喪捽伙記型

喪捽,但唔話你知點改善咁抵死。老闆捽伙記工作,天公地道,眼高手緊的會捽得勁D,呢把呎沒有國際標準,難為正邪定分界。

但「接受唔到囉」是話你呢度唔得果度你傻架,捽完鬧完就係唔講你知點樣改善,只拋低一句:可唔可以再執靚啲、改到個客收貨為止囉、我要誇得嚟低調好難咩!須知塵世間只有更靚沒有最正,這個Mall姐,偏你遇上!

3. 腦退化型

一日變三次,次次都唔肯認。做得老闆有些特權,明嘅。其中一款係可以隨時話變就變,唔洗交待原因更加唔洗止意有幾句安慰說話。查實你果陣已經照佢老人家意思差不多寫完份幾十頁嘅report。

好,你話要改呢改路,都忍你。但天地不容之處是你老闆唔肯認係佢改變左睇法,打倒左今朝十點嘅佢,仲話係你唔誤解左佢意思,你差些想報警求助。最後當然冇,講了聲sorry之後,繼續依照佢下午兩點七嘅意思重寫一次!

4. 卸膊無底線型

有投訴,一定入伙記數。個客發爛渣想r著數,亂屈投訴,為張coupon,喪盡天良,乜野做唔出,你見唔少。你已經扮晒鶉春跪晒玻璃,個客係要追殺要搵個話得事出嚟投訴你恕睥佢,真係信佢一成,雙目失明。

好,照交戲,call上司到台前,佢一上台即say左十萬句鎖你,豪左二十張coupon個客。

送走了個VIP後,老闆竟然開你拖,話你做乜要怒睥個客,唔識handle情緒衝突,要上司處理。最後話明白你經驗尚淺,俾多次機會你,但果二十張coupon出唔到數,要啃左佢!你—條—Mall—姐!

有冇一個Mall姐係左近?想知點樣拆招,下回分解。

各位若遇到職場管理、辦公室政治、人際衝突、或前途抉擇等難題,歡迎留言提出。

筆者會詳盡分析和解答,亦可瀏覽筆者facebook 專頁

【其他熱話】On Call 24小時  打工仔遇上Mall姐的悲哀

【其他熱話】醫學界立法會議員陳沛然 媽媽一句話令他當醫生

撰文 : 孫立民 盈力僱員服務顧問