孫立民：老細一句激嬲打工仔的說話

端午節又到，令人想起愛國詩人屈原，死得壯烈。時也令人想起在職場腦細屈員工（簡稱「屈員」）事件，無日無之，亦往往令打工仔吐血而亡，沉冤待雪。下是一些經典的「屈員」事件簿。

1. 我知你得嘅，公司靠晒你

「靠晒你」係堅嘅，「我知你得嘅」，嘿嘿，信佢一成，地球會停。

明顯有單豬頭骨，其他人都喪耍手，甚至以擘炮相脅，係得你唔敢say no，腦細又不想嚇怕你，於是用糖衣包裝老鼠藥，屈你含笑入黃泉，無得反抗。

我知你得嘅，公司靠晒你，

如果用谷歌翻譯器，真正的意思是：

我知你未上車，你靠晒公司份工！

其他同義詞包括：

公司好器重你，想你負責埋….. ：三個road show、兩份tender、同埋一個十年嘅year plan，下星期一by 10點鐘放係我枱面。你知啦，公司好器重你，梗係搵個信得過架啦！

2. 我明明講得好清楚，你點解唔照我意思做 

明嘅明嘅，你當然係百份之二百跟足方丈意思做，唔駛勞氣。方丈沒有患阿滋海默症、認知障礙、中風、前列腺癌……，只是他老人家思前想後，打倒了三小時之前的自己，但又唔肯認，只好屈你老人痂呆。

你如何回應好？

sorry sir，係我一時大意，即刻改，一個鐘之後交俾你。

你有其他選項咩？

3. 公司一賺到錢，一定會追番加10%人工俾你地 

講得

公司一賺到錢… ，

打工仔就會好驚，即係公司一路蝕梗錢，腦細要屈你凍結人工。因為前者一定唔會出現，所以後者只會永藏心間，如果揸係手裡面，會化為灰燼。

你應該留守搏遣散費，定早quit早著，that is the question！

4. 個客投訴得即係你唔啱囉

明係個客靠大聲r著數，死咬住唔肯放，屈你退貨加coupon，你已經好聲好氣賠了十萬個不是。係佢堅持要搵個話得事嘅出嚟，你退冇可退，只有call方丈出山，你以為方丈堅有料擺平，誰料佢竟然係個客面前講左一句：

個客投訴得即係你唔啱囉，

OMG！

此刻你最想做嘅，就是把腦細紮成糉，跟住掟佢落城門河（貪佢夠污染）！

免責條款

FF only，千祈咪當真，記得明天準時返工。記住，你等緊買iPhone 8，你靠晒公司份工！沉冤待雪嘅野，日後至講未遲。

各位若遇到職場管理、辦公室政治、人際衝突、或前途抉擇等難題，歡迎留言提出。

筆者會詳盡分析和解答，亦可瀏覽筆者facebook 專頁。

標題經TOPick編輯修改，原題為〈屈員（腦細屈員工） 沉冤待雪〉