孫立民：別讓工作填滿你的生命

曾燕紅老師用了七年時間，辭去教職，花了超過一百萬元，險些死去兩次，去一個八千米的山峰，那裡冇7仔，上唔到fb打卡呃like，去唔到IG post相，冇得snapchat影濾鏡變瞼，連印花都冇個，去嚟做乜？

或許應一個承諾、或許還一個心願、或許接一個挑戰、或許我就是鍾意、或許是同條命鬥氣…..。或許人生有好多好多嘢，anyway，別只讓工作填滿你的生命！

職場菜鳥 – 要搵樣野識飛

如果你家陣廿零三十歲，未入結婚生仔這個局，應該博殺博上位博機會，不要博大霧。你要叻過隔離果位，高過平均線，要搵樣嘢識飛！

工作絕對是main course，ＷhatsＡpp吹水、去十字星石打咭、打爆英雄聯盟、玩war game，都是頭盤甜品。在黃金檔期work hard打拼一個鐘的回報率，絕對高於四五十歲的一個鐘。而家唔搏，難道等到花兒也謝了？

不過話說回頭，若fine dinning只有main course而沒有頭盤甜品，一個字，寡，兩個字，霉友！是生命的霉友！

事業穩定 – 要搵樣嘢mean something

當事業進入穩定期，即六成工作你不用驚動大腦便完成。工作的含量應該降低，準時放工不是一宗罪，顧不了方丈黑面。放假的時候，避免hand carry工作回家，做點有意義的、喪好玩的、任性的、體能的、藝術的、吹水的、贖罪的、幾型仔的......，總之ABW Anything But Work。

友人在網上查到香港約有130座山高於三百米，於是計劃走遍這些山峰，用了兩個行山季節，他跑了110個，還欠二十個，今季會竣工。或許這計劃對人類和平保衛地球沒有什麼貢獻，但友人說去征服，去完成一項任務，mean something，絕對add color and add oil！

筆者近年試玩長跑，參加訓練班，參加比賽(當然是有分齡的才參加)，沒有得過頭三名(最威果次得第四)，但看見自己1K的pacing由6分到5分到4分，屢創personal best (PB)，成就大過簽咗個大客X3！記得當跑完人生第一個10K時，感覺同曾老師唔差太遠，非常之治療性！

不要讓工作令你錯過…..

• 阿B第一次識得自己走路
• 中學同學約行狗牙嶺
• 曹星如迎戰日本拳手向井寬史
• 文化博物館展出羅浮宮一百三十項珍藏
• 美劇權力遊戲第六季全十集
• 阿女被男友飛call你訴苦

當工作忙到令你錯過了以上的片段/情景，你的人生還剩下多少價值？你不是白忙，是蝕忙！

曾付出幾多心跳，來換取一堆堆的發票

人值得命中減少幾秒，多買一隻錶

秒速捉得緊了，而皮膚竟偷偷鬆了

為何用到盡了，至知哪樣緊要

天空有雙彩虹

記得有一天黃昏的時候，在辦公室正埋頭工作(認，係有睇埋facebook)，偶爾望出窗外，飄著絲絲細雨，陽光從雲隙中綻射出來，駭然發現天上掛著一條雙彩虹，各位觀眾，係完整的雙彩虹，double rainbow，橫跨了維港的上空。

那種震撼，使人睜大了眼睛，不懂言語！(但仍然記得影相post 係所有人類已知的社交平台)，我同自己講，I shouldn’t be working！

生命，生命這好傢伙
何時我也說它不錯
燃亮我…..

是它是它給我天空和浮雲
還讓我去印下腳印
讓我聽宇宙聲韻……

任性的quota

人一生被編碼了讀書(最好入名牌大學)、工作(最好政府工)、結婚(最好係女神男神)、生B(最好入國際學校)，到要供養父母、考順子女(最好有層樓俾佢揸手)……。

See，任性的quota有限，趁退休之前，行使了配額。要求唔高，唔駛你擘炮去南非做backpacker。試下請日假，半夜出發，戴住頂頭燈，去鳳凰山頂影幅日出相(記住搵多個friend)，post係筆者的專頁，冇獎，但型囉！

各位若遇到職場管理、辦公室政治、人際衝突、或前途抉擇等難題，歡迎到筆者facebook專頁留言提出。筆者會詳盡分析和解答。