利嘉敏：如何讓子女明白父母的苦口婆心？

友人七歲女兒靜雞雞向我傾訴：

媽咪成日鬧我，今日出門口先鬧完，我覺得佢好煩。

她鬧你甚麼？

我問。小女孩扁嘴答道：

鬧我成日無時無刻玩手機，行路又玩、坐車又玩，又話我睇得太近會近視。佢夠有時玩啦！

說時，一臉不服氣。

此時講道理，實屬「嘥氣」，而那些「道理」她也該聽過，若一早聽得入耳，就不會心生悶氣。於是，我跟小女孩提議：

不如我哋玩個遊戲吖！我做你個女，你做我媽咪。

但見小女孩碌大眼仔看着我：

我做你媽咪，你做小朋友？

小女孩因忽然「升呢」可做「大人」而興奮。我跟她說：

不過，我呢個小朋友最鍾意玩手機，我哋依家坐緊車，仲要將個頭『黐』到好埋個手機，你係我媽咪，你會點呢？

說畢，馬上拿出手機耷低頭手撥撥作狀扮「機迷」。小女孩連語氣都變了：

喂，妹妹，我講過好多次，唔好坐車玩手機啦！你咁樣會睇壞對眼㗎噃！

我不理她繼續撥手機，她又說：

妹妹，你咁唔聽話㗎！

我抬頭黑口黑面對着她說：

得啦！你好煩呀！成日唔俾我呢樣、唔俾我嗰樣！

就這樣角色調換十分鐘後，我再問小女孩：

你做我媽咪的時候有甚麼感受？

她答：

我叫極你都唔聽，同埋你黑口黑面、態度唔好，駁我嘴嘅時候，我真係好想發嬲，不過我叫自己控制住。

跟住我再問她：

咁你會唔會因為我唔聽話、黑口黑面對住你而放棄教我同勸我啊？

她堅定語氣答：

唔會！我係你媽咪，你繼續咁就會近視！我唔會因你唔聽而放棄嘅！

小女孩低頭靜思幾秒，然後靜靜地抬頭微笑說道：

我明了。

我倆相視莞爾。

她這個「明」，我知她真的懂了。兒童發展心理學很強調perspective-taking（用別人觀點看事物）對兒童發展的重要性，不能明白其他人的觀點和角度，就很難培養同理心。而小孩三歲後就有這種能力，但能否發展和發揮，就要看大人有否在意培養和給予機會。Role-play（角色扮演）是培養perspective-taking最佳方法。

像以上情況，再一味說教、一味「哦」或鬧已無效，因孩子仍停留在「孩子」角度看事件，只會覺得「大人好煩」。來個role-play，讓孩子當起「父母」，才能感受一點父母的心情和難處，此法既有效又可當親子遊戲玩，最重要是，可免勞氣「慳番一場交」。

全文刊於《經濟日報》（收費閱讀） 

標題經TOPick修改，原題為「慳番一場交」。