男人笑中有淚 版主剖白「十萬個激嬲女友的理由」
發布時間： 2017/06/09 12:57
最後更新： 2017/06/09 17:59
「唔記得女友啲公仔叫咩名 然後，佢嬲咗我」、「女友唔舒服，我叫佢飲多啲暖水 然後，佢嬲咗我」，激嬲女朋友的理由，何止十萬個？開業半年，累積了9萬粉絲的Facebook專頁「十萬個激嬲女友的理由」，分享一眾戀愛中的巴打激嬲女朋友的投稿，講中不少男友的無奈。
男女版主本身是讀書時相識的同學，由MSN年代開始拍拖4年多，男版主坦言大家有共同嗜好，又係「鍾意做無聊事嘅硬頸人」。性格相似自然會硬碰硬，當中一定有激嬲女朋友的經歷，不過男版主笑言，自己的「受害故事」，簡直小巫見大巫。
問：點解會開「十萬個激嬲女友的理由」？
男：上連登時見到有不少巴打分享女朋友發脾氣嘅故事，好多都好好笑，而且又會覺得有共鳴，自己又有很多經歷，所以就開呢個Page。
本身是想俾一眾巴打圍爐取暖，但後來愈來愈多絲打投稿，近期男女投稿比例大約6比4。
問：女版主知道之後有咩反應？
男：一開始無話佢知開咗呢個page，諗住過一陣有多啲人like先話俾佢知。但係有次發現到啲蛛絲馬跡，我就索性坦白招來。
女：佢話俾我知嘅時候我都嚇一嚇，但真係無嬲，反而笑出嚟。
問：第一個關於自己嘅故事係咩？
男：我幫佢影相嘅時候無數一二三，影得佢唔好睇，再加上其他原因，佢就嬲咗我。呢個係我搞呢個page第一時間諗到嘅經歷。所以我電腦關於呢個page嘅folder名都係叫「影相冇數一二三」。
女：咁小嬲都係一種情趣嚟嘅。
問：收到嘅投稿多數是咩類型？
男：一開始係偏向有共鳴，當時最多人like嘅投稿係男朋友嬲緊，而女朋友氹唔到男朋友，然後女朋友竟然使出一招反客為主，嬲返轉頭。投稿一出，page like即刻由幾百升到一萬左右，可以話係令個page爆紅嘅故事。
之後開始多「男子花式自殺比賽」嘅投稿，而且愈來愈多，不過有啲真係撩交嗌嘅就唔會出。
近期都多咗一項分類，就係唔關自己事都會中伏。例如去買旗，細路叫女朋友做姨姨，個女朋友都會嬲咗男朋友，男朋友結果無辜受罪。
問：版主心目中嘅「男子花式自殺比賽」冠軍投稿係邊一篇？
男：花式自殺嘅精粹在於個男仔以為講笑，點知女仔認真咗，踩曬界。我覺得最好笑係呢篇：
女：呢篇真係好好笑。
問：一齊管理Facebook Page之後，女版主仲多唔多嬲？
女：少嬲咗好多，因為睇得太多無理發嬲嘅投稿，都會提醒自己唔好咁易嬲，同埋有時都會自嘲，覺得自己嗰啲真係小巫見大巫。
男：同埋一齊搞個Page就好似一齊做Project咁，多咗共同話題，會一齊睇投稿。睇得多投稿、留言真係會學精咗，有時佢開始嬲個陣，可能講一句「然後，佢嬲咗我」就化解到。
問：激得女版主最嬲嘅係邊一次？
男：其實佢嬲我係有Pattern，一個月一次勁嘅，同一件事發生喺月頭同月尾，結果可以好唔同。試過有次俾佢睇同女同事嘅Whatsapp對話，真係好普通嘅對話，之後佢嬲咗一兩日。
不過男仔唔會意識到有問題，知道會出事我就唔會特登自殺啦。
女：不過佢都唔會自殺。
問：女版主嬲緊嘅時候似邊種動物？
男：吓……唔出得街㗎喎……貓頭鷹啦，木口木面、黑口黑面。
問：點樣氹女朋友？
女：一火遮眼個陣真係點氹都無用，佢會拗但我唔想聽，佢真係唔識氹。
男：我唔係拗，係講道理、解釋。
女：我個時真係唔想聽。想佢笑住咁氹。
男：試過啦，我笑住咁氹，結果俾佢問：「笑咩啫你？」買嘢氹佢又話會俾佢話曬錢。
女：火遮眼個時做咩都無用。
男：有個case，女朋友嬲咗男朋友，就叫男朋友唔好搵佢。有個留言話，男朋友點都要去搵女朋友，出一出現聽女仔講句「俾我靜下」先係做到嘢。
所以有時其實係預左俾佢鬧，明知無用都要氹，如果唔係佢會記住你當時無做嘅事，會更加嬲。
問：有無試過男版主嬲返轉頭？
女：佢話無嬲嘅，不過佢好容易會忟。
男：有時我忟未必係關佢事，可能排隊等得耐、太熱、俾蚊咬，我都會忟。
女：見到佢忟，結果我都會忟埋一份。
問：見過唔少投稿，覺唔覺得做男朋友好慘？
男：其實有時女朋友都好慘，特別係花式自殺嘅絲打投稿，多數都係男朋友抵嬲。
女：咁明知同個Ex出街一定會激嬲女朋友，呢啲抵嬲啦。
問：女朋友真係咁易嬲？
女：其實女仔係好矛盾。例如男朋友約兄弟去飲嘢，女仔就會覺得唔俾佢去又好似唔係咁好，最好就佢自己話唔去啦，但佢咁講嘅時候又會覺得好似阻住佢咁。如果佢去，自己又會覺得悶，好多掙扎。
同埋有時未必關男朋友嘅說話事，而係態度問題，可能佢會用好忟嘅語氣講嘢，而女仔明知一件事唔使嬲咁耐，都要鬥氣繼續嬲。
問：有無覺得就算對方嬲，都好窩心嘅時候？
男：我病緊個時都要睇波，佢又唔想我睇想我早啲休息，就會不停叫我唔好睇快啲瞓。
女：雖然點講都好，都係無用，佢都唔聽。
男：同埋我病緊個陣佢都會叫我唔好飲凍飲，都幾窩心。
但佢病，睇完醫生唔會食藥，我會話佢，會忟，但都要氹佢食藥。
問：工作唔同會唔會難溝通？
男：其實問題唔大，不過佢有時都會同我呻。
女：多數都係同佢呻人事關係，講吓上司呀同事呀，不過佢通常冇乜反應。試過有一次同佢講，佢仲答我「係咁㗎啦」。
男：咁佢緊係想我同佢嬲埋一份，如果唔係就好似覺得我幫住人哋，覺得佢唔講道理。
女：然後，我嬲咗佢。
【其他熱話】楊千嬅X余文樂 港男港女的愛情故事
【其他熱話】蔡卓妍X周柏豪談愛情觀 拍拖目標是結婚？
【其他熱話】化粧不是罪 兩性達人教路婚姻長期保鮮6大要訣
