曾智華公開挑戰吳克儉：請將外遊報告公諸於世

捱吓捱吓，終於捱到二○一七年六月最後一個星期喇，好嘢！點解好嘢？大家心照啦！

今屆政府，講真，有不少核心人物令人眼冤，有的講大話唔眨眼、有的撩事鬥非，最惡啃的一位，我肥碌認為是擁有官場花名「Simon Fan」，及外界花名「唔得掂」的吳克儉。

任何正直正氣正義守紀律有羞恥之心的公職人員，見到「老唔」，都會：一、嘖嘖稱奇（點解可以面皮厚過防彈玻璃？）；二、想知是否上司好怕見佢（故此不停「亂批」佢「遊埠」，次數之多，非常嚇人！）。

我肥碌作為三十多年公務員，都算有少少「老是佛」，但仍覺「老唔」實在「功力」奇高！咁都過到骨，點到你唔服！

大家可知，公職人員申請出外公幹，並非沙沙滾求求其其，必須出師有名，擬定目標、範圍、原因、效用……再連邀請信交上司審批。上司除非同佢私下「圍威喂」又或「盲」嘅，否則，為避嫌，都會認真處理，絕不會一人獨批，必定再交高一層countersign。

基本智慧及邏輯，一個局長，五年任期內環遊世界外訪六十幾次，根本在香港官場前無古人。

最基本質疑：一、有真實需要？二、是否次次必須局長親自去？三、霸晒所有外遊機會，可有考慮同事感受？四、有沒有關注個人及局方負面形象？五、香港本土工作可隨便放低的嗎？

最最最重要，公務員每次出公事trip，回來必須寫報告，解釋此行對政府、自己及社會整體得着。

今日我挑戰「唔得掂」，請快快將六十幾個report公諸於世，咪側側膊藉詞退休就縮埋個窿失蹤。否則，必定千古留臭名！

【其他熱話】頻撲局長吳克儉　2年半外訪30次開支逾117萬元

【其他熱話】被稱為「旅遊局長」 吳克儉喊冤：半日去深圳都當1日！

【其他熱話】吳克儉：退任後去「真旅遊」