80後P牌媽咪：孕婦完全不能飲咖啡？

某日，我呢個大肚婆好歎咁沖咗一小杯咖啡輕鬆度過三點三。一位auntie級同事經過見到，立即驚呼：「咖啡？你唔飲得㗎喎！」搞到成層樓啲人望住我，好似我做錯事一樣。「唔好飲啦，我幫你倒咗佢。」「吓，我飲咗一半啦喎。」「一啖半啖唔怕……」跟手拎起我杯啡去pantry倒，返嚟連杯都洗乾淨，真係唔知好嬲定好笑。

我知佢一番好意，但我絕對唔buy呢種「斬腳趾避沙蟲」嘅做法。點解一啖半啖唔怕？一杯又唔得？呢個標準係點嚟？與其以個人觀感判斷，不如參考外國標準：

根據歐盟食物科學委員會建議，孕婦每日可攝取嘅咖啡因含量唔應該超過300毫克；英國嘅標準緊一啲，每日唔超過200毫克，過量有機會影響BB發育。

200毫克咖啡因係咩概念？或者可參考下TOPick嘅報道。其實喺日常生活中，除咖啡外，食朱古力、飲茶或可樂一樣會攝取到咖啡因，當中尤以咖啡嘅咖啡因含量最高。報道講到，一杯250毫升嘅咖啡約有118毫克咖啡因，理論上飲一杯未算超標。

但又唔好太老定，以為日飲一杯咖啡無問題。由於坊間咖啡用料及沖泡方法大不同，咖啡因含量亦有好大差異。Audrey搵到消委會2013年嘅報告，入面羅列多間茶記及cafe飲品嘅咖啡因。細心閱讀便會發現，某啲餐廳出品嘅咖啡或奶茶，一杯已超出200毫克咖啡因上限。因此大家最好購買一啲可量化嘅產品，或轉飲低因咖啡，飲起嚟自然安心又放心。

【延伸閱讀】 可樂VS咖啡 飲品咖啡因含量比拼

【延伸閱讀】港式奶茶咖啡因勁過星巴克 飲得多會點？

全文刊於《晴報》

晴報facebook