孫立民:哈佛沒有教的職場新手課

職場 12:24 2017/07/19

分享:

職場菜鳥,即出來工作未夠一年的新手,常常覺得好難上位,腦細過左三個月仲係叫唔出你個名,更遑論追過同事,成為fit馬。不用顧影自憐,其實很多細眉細眼的日常行為,特別在人際和工作態度方面,tune番少少,已可以令你稍稍帶離其他同事。

  • 人際方面

1. 禮多有人like

不要說咁小學雞,很多後生同事見到人掂行掂過,對話時眼神總射左射右不望人,初見面頭五秒已被叮出局。由入門說起,Lift停時hold住個open掣讓其他人先出、入方丈房要敲門同講聲唔好意思(扮下都得)、說話時要望住對方眼睛(除非對方係八兩金)、與同事吃午飯時不要第一個攞手機出來篤(約第三個已安全);別人感激你的幫忙說唔該,你要回禮講聲「唔洗,小意思啫!」這是人氣。

不想把事情功利化,但從心底出來的禮貌,常會令人有很多美麗的聯想:有修養、心地善良、具同情心、孝順、愛情專一、借錢實還……,這是禮貌的紅利,有槓桿效果呢!不過最高境界的禮貌必是發自內心,呢個年頭做得到,必屬異數。

2. 化身暖男

塵世間有那個不喜被關心被like?見到同事有兩聲咳,成個病樣出晒嚟,埋位問聲:「咳呀你?」知,係好廢下,但如果同事咳到連血都出埋,竟然冇人理會,這是一班什麼的冷血同事!一句「咳呀你?」再遞上必理X或幸福XXX,送來人間暖流,秒變辦公室暖男!

有同事著了件新戰衣回公司,此刻你要sale上身,俾少少戲講聲:「咦,件衫好得喎!」她雖然口說:「邊度係!」心裡就會覺得:「蝦,後生仔又幾有眼光播!」

暖男的升級版是識得欣賞和感激,每個人總有他的秘技、強項和光輝的一頁,不論是Mall姐或清潔英姐,不論是精練能幹或用心工作,都不難找到like位。豪過like俾人,必成工作間萬人迷,本小利大回報高!

3. Stay Hungry Stay Foolish

職場新手有時心急於表現自己,很想三日內要告訴全公司他曾經得過學界排球亞軍,又識得一點韓文、個marketing plan是他出點子的。這些都是事實,但不需咁揚,強項讓人陸續發現來得有點驚喜,特別是因工作需要而自然流露為最高境界。

新仔最忌囂和鋒芒畢露,令同事會感到受威脅或唔順你,叻唔切通常死得最快。特別是與old sea food合作,他們普遍喜歡自己表現多過看人家表現。所以多點請教請教,他們反而放下介心,覺得受到尊重,願意過少少料給你。

新手重點是要吸收,不是暴露。永遠記著Steve Jobs說的stay hungry stay foolish,做得出iphone的人,唔會錯得去邊!

  • 工作方面

4. 蝕水嘢不怕多做

唔計較,即係做蝕底野,當然唔係大部份人杯茶,但正正如此,能夠把你從其他人中分別出來。蒸餾水機冇水、影印機冇紙,主動去換去加;見到辦公室地下有舊垃圾,不用以為有隱藏鏡頭,主動執起。

最感動人心的,當然是見到同事忙到成頭煙,你可以上前好英咁同佢講:「唔知有啲乜野我可以幫到手?」就呢一刻,你發揮了人性的光輝,儒釋道的精神,女神會like你,小鮮肉想date你、old sea food都會感動!

做蝕底野當長遠投資買期貨,而且容易冧同事冧客冧方丈,回報率通常高過兩兩計較,值得大手入貨!

5. 細心慬慎要番睇

職場最唔抵的扣分事件是大意和甩漏,打錯公司名、銀碼和heading,format不統一,漏了通知個客deadine交款、mark錯腦細去開會的時間…等等,都會令方丈核爆!

一切源於你粗心大意,不上心。一般打工仔都怕番睇,你肯去做,交的功課無明顯甩漏,勝!特別是重複犯相同錯誤,是有組織及嚴重罪行。錯一次是大意,錯兩次是性格!方丈不會重用。

做得到上面幾點,不會令你明天就紮職,不過幫你執靚番個跑姿,似番個pro,發力用得其所,正所謂輸人不輸陣。職場是長途賽,跑得順,自然跑得快,我唔呃新仔!

各位若遇到職場管理、辦公室政治、人際衝突、或前途抉擇等難題,歡迎到筆者facebook專頁留言提出。筆者會詳盡分析和解答。

【延伸閱讀】孫立民:信任員工的自行決定

【延伸閱讀】孫立民:少點投訴 多點快樂

【延伸閱讀】孫立民:遲到一分鐘算遲到 OT一粒鐘不算OT

撰文 : 孫立民 盈力僱員服務顧問