鼎爺灑淚憶母親住家飯：呢份付出有錢都買唔到
發布時間： 2017/07/25 11:04
最後更新： 2017/07/29 10:42
上輯《阿爺廚房》口碑強勁，是非亦隨之而來，被指鬧不和的鼎爺和譚玉瑛於專訪中談笑風生，可見所有傳聞純屬加鹽加醋味精一碟，譚玉瑛笑說︰
現在我們都熟多了，因為上輯開拍前大家只是互不相識的同事，彼此太客氣而就住就住，連或行或坐都很禮讓，今輯我不會過分擔心由誰坐先行先的問題，不知道他有沒有？
鼎爺即答︰
我沒有！今次與阿譚說話不再拘謹，「噏乜就乜」，就像屋企人。
追憶故人身影回味親情
都說鼎爺是性情中人，剛烈如他竟突然在專訪中流下男兒淚，只因一個女人。
當有時煮餸很辛苦時，就會想起老媽子當年如何樣辛苦。為何我學識煮餸？我老頭子只是韓信點兵，從不會煮給我食，阿媽好錫我，總叫我走出廚房幫我煮，老頭子就鬧她︰「他將來放屁都要你撳住啦，慈母多敗兒！」
鼎爺眼泛淚光哽咽道︰
看住老媽子大汗疊細汗、天冷又捱凍，很辛勞煮飯熬湯給我們食，有時見她坐凳仔煮到打瞌睡，真的會流眼淚。當我現在煮飯給兒孫吃時，更能體會到老媽子那份愛，是要做人父母才知家長的心思，每次想起都好感觸。
鐵漢柔情就是如此粗中有細。
兩人嘗遍珍饈百味，卻說最窩心的菜式就是有人肯為你下廚，鼎爺說︰
如阿譚請我到她家食飯，那道菜她煮得未必好食，但那番心意、時間、準備，已很窩心。證明她是好尊重、欣賞我，才會邀請我食住家飯，否則她大可請別人或直接到酒樓食。這份付出，令人感動，錢都買唔到。我用2萬元請你出街食，不見得會好過用200元煮給你食，貴不代表好食。
阿譚點頭稱是︰
到五星級大酒店食飯或上你家食飯，兩者花的錢可能差不多，但後者付出的時間、心思，人家係會感受得到。
用愛心煮就是最好調味
阿譚坦言主持這節目，不但可「食好嘢」，還從鼎爺身上透過煮餸學做人。
他常跟我說︰「慢慢嚟，唔好急。」我份人本身好急，想任何事都很快做好、一日內想做很多件事，所以常在廚房弄傷自己，讓我領悟到煮菜切菜可以慢慢來。
人生好多事都可如此，生活遇上不如意事，可以不用即時畀反應，慢慢處理，件事會自行變化、自己的情緒也不會激動，冷靜會睇得更清楚，個結局就會不同，比起即時做反應好好多。
鼎爺今年71歲，與阿譚同樣精力過人，全因凡事睇得開。
曹操也有知心友，關公亦有對頭人。睇開些，不要太執着，我都會嬲，但不會嬲太耐，盡量令自己放鬆些。
他們的飲食之道很簡單，阿譚笑說︰
我們有一個共通點，就係「冇嘢係唔食」，也不會節食，放得入口的就食。
鼎爺更叫大家不要盲目追捧食療︰
千祈不好信，信就死得，有人說食當歸好，你餐餐食，一定爆血管。
兩人最想觀眾看完節目不止學懂煮「90道鼎味」，還能掌握人生極致滋味︰愛。
阿譚指︰
跟足recipe都未必好食，如果不用心機去煮，是食得出有分別。
煮食是一道橋，希望觀眾學識煮食都是一種愛的表現，大家可以在當中發揮愛、表達愛。有人說成日講飲飲食食，好膚淺，其實飲食並不膚淺，況且人膚淺些也是好事，我們好多時都諗多咗。
鼎爺總結︰
有愛，就會煮得好，這騙不了人。
【延伸閱讀】《阿爺廚房》回歸 李家鼎：廚房是一個家的中心
【延伸閱讀】方太與你烹調五味人生 別因小事而抱怨和放棄
【延伸閱讀】港媽創業4年開兩曲奇店：老闆就像高級打雜【有片】
撰文 : 鄺素媚 TOPick記者
