我的懷孕日記 BB展備戰攻略

親子 13:18 2017/07/28

分享:

下個星期灣仔會展即將舉行BB展啦!各位有無做足準備去掃貨呢?對於即將迎接小生命、兼大量必需品未買嘅準爸媽,BB展確係一個貨品集中又抵逛嘅購物場所。

首先,若果你從無加入過任何尿片、奶粉或嬰幼兒品牌嘅媽媽會,呢個絕對係入會嘅好時機。一般來講,喺展覽前大半個月,各大品牌已經喺網上展開宣傳攻勢,以不同贈品作招徠,譬如DHA油丸、尿片和奶粉sample、孕婦抱枕等,吸引新手爸媽入會,然後叫你去BB展會場攤檔領取。因此各位有備而戰之士,記住帶個大背囊、甚至行李箱入場。

入會所吸納嘅sample,最適合臨盆時放入「走佬袋」陪產。到咗BB出世,品牌又會向你送上奶粉、尿片等祝賀。咪睇少呢啲贈品,其實都夠應付初生BB頭一陣子所需。

此外,現場亦有好多實用講座,解構孕婦飲食營養、初生BB照顧、產後護理等,有時間可與老公一同參加。

講到最重要,又點少得掃貨?猶記得Audrey初次踏足BB展,見好多人將大包、細包戰利品搬上車,可惜當時我對各產品嘅優劣、價錢均無概念,只好空手而回。後來就醒目啦,早於展覽前幾個星期,已開始「巡舖」做research,逐一mark低產品價錢,回家上網搜尋品牌資料與口碑。另外,又喺大會網站預覽精選優惠,對準目標。當日去到會場,自能速戰速決!

最後奉勸各位身懷六甲嘅媽咪,BB展人頭湧湧,小心碰撞,粗重工夫等老公嚟啦!

原文刊於《晴報》

《晴報》Facebook

【其他熱話】我的懷孕日記 BB會否有唐氏綜合症?

【其他熱話】我的懷孕日記 大肚唔好食泰國菜?

【其他熱話】媽媽懷孕長出黃褐斑 分娩後會自動消失?

撰文 : Audrey Ng 80後P牌媽咪