名校女童曠課 母親疑惑：點解獎勵歐遊都氹唔掂？

十歲女童就讀本地名校，多年來一直名列前茅， 琴棋書畫可謂樣樣皆精。一直以來父母都賞罰分明，尤其在奬賞方面，女孩只要是獲得好成績，就會獲得不同奬勵，例如零食、文具、波鞋、首飾、出國旅行等。但半年前開始，女孩似乎忽然欠缺學習動機，開始曠課及逃避興趣班。

家長：「佢不嬲都好成績又聽話，彈琴達到演奏級，畫畫比賽又攞奬。之後唔知點解各方面都開始退步，最近佢唔返學，又勸又氹都無效，點算好？」

我：「點樣氹佢？」

家長：「我話如果佢肯返學，就會帶佢去歐洲玩。我不嬲都係言出必行嘅人。佢知道我唔係信口開河，但我真係唔明點解完全無用。」

我：「似乎佢嘅價值觀建立錯咗。佢以前會為咗啲「奬勵」先努力，但呢個方法對佢已經失效。」

家長：「乜奬勵唔係可以強化佢嘅做事動機咩？」

我：「某程度上係。但係你同囡囡之間嘅『奬勵模式』，似乎係物質上交易嘅關係，多過對佢嘅能力上真正肯定。」

家長：「 .....我唔係好明喎⋯⋯」

我：「物質上嘅奬勵始終有限制，冇可能無止境咁擴大落去。唔通下次你話：如果你做得好，我就帶你去月球旅行咩？重點係佢要相信自己有能力，而唔係要佢證明自己有能力。」

家長沉默不語。

女孩來到治療室接受治療，她很喜歡繪畫。她不但用心，而且不論畫功、用色、內容、構圖都很高水準。

女孩：「我畫完啦，靚唔靚呀？」

我：「我見到你頭先好專注投入畫畫。我估你都幾鍾意畫畫。」

女孩：「一般啦⋯⋯咁你覺得靚唔靚呀？」

我：「你覺得呢？」

女孩：「我問緊你呀，你又問返我？」

我：「其實『我』覺得點並唔重要，最重要係『你自己』點睇？」

女孩略有所思，然後向我展露微笑。

後來女孩每次來到治療室，都會畫一些畫。大多數的畫，乍看都是「一塌糊塗」，可是她都很盡情。

有一次，女孩：「我覺得呢幅畫係我一生人畫得最靚嘅！我從來都未試過咁畫嘅。」

我:「你好欣賞自己幅畫，你覺得好自豪。」

女孩：「如果以前呢幅畫比媽咪見到，佢實鬧到我飛起。」

我：「呢個想法好有趣，可唔可以分享多啲？」

女孩：「我估佢唔鍾意呢一類畫，所以我從來都冇畫過。」

我：「你似乎想講：以前畫嘅畫好工整，係為咗討好Mummy，但今日呢幅畫，你係為咗自己而畫嘅。所以令你覺得好滿足。」

女孩點頭。

在完全沒有奬勵，沒有需要討好任何人情況下，女孩盡情真我揮筆，滿心歡喜細心欣賞自己的作品。

很多時候，我們作為家長都希望小朋友「聽話」，而且用「星星奬勵計劃」誘導他們？可是，家長又有多少時間，真真正正能「聽見小朋友的說話」？可以讓他們「做自己」？

後來女孩再次重拾動力學習，而且比以前快樂。

因為，她的價值觀不再投放在別人的認同上，而是專注於自己的內在能力發揮。

父母如何教出有品德、有自信心、高EQ的好孩子， TOPick邀請 兒童行為情緒治療師葉偉麟開辦3場親子教養學堂，立即點擊此處報名！

【其他熱話】兒童行為情緒治療師：別跟發脾氣的小朋友講道理

【其他熱話】兒童行為情緒治療師：家長陪「玩」的盲點

【其他熱話】小朋友以主人口吻呵斥傭工 兒童行為情緒治療師拆解成因

文章獲兒童行為情緒治療師葉偉麟授權轉載。