鄭丹瑞：食鹽多過你食米已不管用

經常聽老人家講：「我食鹽多過你食米啦！使你教我？﹗」這句比喻相當抵死，也十分貼切，只是，言者沾沾自喜，聽者耿耿於懷，因為這句說話背後的潛台詞是：「我識嘅嘢多過你！」「你唔識嘢！」「我唔使你教！」很不客氣，甚至帶點敵意。

年輕人急於要證明自己，有時少不免踩過界，觸動了成年人的神經，一句「我食鹽多過你食米」，是希望年輕人知難而退，卻往往忽略年輕人是初生之犢，話知你死！所以，這句前人智慧，在今天這個精神分裂的社會，已不管用。

突然之間想起這句前人的智慧，是因為某天聽到一班年輕人跟成年人的對話，成年人搬出「食鹽多過你食米」的態度，發出「點解你哋樣樣都唔妥成人世界」的疑問。年輕人的回答，令我眼界大開：

大人的確食鹽多過我哋食米，但係佢哋無發覺到，原來我哋呢一代已經實行少鹽少糖，你食過幾多鹽，同我無關，呢個亦都可能係點解我哋永遠無辦法坐埋一齊好好傾偈嘅原因。

「食鹽多過你食米已經out咗好耐，無人再講㗎嘞！依家只要改一個字，就係今日嘅大人嘞！」好事之徒講得十分得戚。

一眾損友都想知道是改了哪一個字？「依家應該改做『我食言多過你食米』啦！」好事之徒這句說話，得罪了所有在座損友，大家一哄而散。

【其他熱話】鄭丹瑞：過分溺愛孩子的父母

【其他熱話】鄭丹瑞：不要給孩子最好

【其他熱話】鄭丹瑞：學好英文