做投行iBanker點解賺咁多錢?

職場 16:50 2017/10/02

分享:

做投行,從來都係賺大錢的代名詞。觀乎StealJobs上面投行的Job Reviews,唔難發現做投行收入普遍高得驚人,以Front Office尤甚。

做iBank固然亦係辛苦的代名詞:工時超長,通頂時有發生,而且仲要任勞任怨,尤其係Analyst及Associcate呢D初級職位(雖然收入已經高過全香港90%的人)。而即使一路升職到VP, Director, MD呢D位 (假如未Burnout轉行的話),亦唔見得會有任何Work-life balance:從被老闆捽變為被客戶捽,光線的西裝,名牌大學學位已經甲級寫字樓的玻璃門表面下,就係要和顏悅色服侍小學未畢業的山西煤老闆與財大氣粗的基金經理。

做ibank固然辛苦,但亦解釋唔到一個問題:大家都打工,但點解特別係 banker會搵咁多錢?

首先必須睇下 Banker 究竟賣乜

投行同任何公司一樣,都係一盤生意,而且係屬於 Advisor 及 Agent類的生意,本質上同車行同地產代理差唔多。例如係二手車行Sales,賣一部二手Audi A4車價20萬,代理的車行可能賺到5%,即係1萬蚊佣金。必須以量取勝,而Sales需要向客戶介紹車輛性能及基本資料。

又例如地產代理,賣一層樓價800萬的「上車盤」,地產代理袋1%佣金,即係8萬蚊佣金。做一單相等於好多人幾個月收入。而代理需要帶客戶睇樓,介紹單位座向間隔,甚至提供樓價走勢的意見。

然後就到投行的Investment Banking部門,本質上就係買賣公司 (及融資:賣股份或賣債券) ,而且係賣以十億元計的公司股份或債券。

假如一單十億元的「中型Deal」,投行的專業費用就可能係6%即係6000萬。而投行要做咩?其實本質上同以上的銷售及建議職能一樣,但金額大好多之餘,仲有好多調查要做,而且有非常複雜的商業條款及法律問題需要談判及釐清。

假如錯任何一個範疇,一單Deal隨時就此作罷。所以需要極度Specialised及富經驗的專門投資銀行家處理。因此,佣金的%可以維持在相對高的水平:因為並非任何人想做就做到以上極度Technical的工序。

由此可見,呢個就係點解投行咁賺錢的第一個原因:超高額產品的銷售帶來的巨額佣金及專業服務費用。

其次,睇下投行開支,相對來講,Investment Banks會比Commercial / Retail Banks賺錢,原因係開支細好多。

以Retail Banks為例,要收取市民的存款並借返出去賺利息差價,周街都要開銀行分店地鋪,每間分行都要請好多Tellers及經理。開支頗高。

但投行相對來講,開支細得多。雖然投行大部份都處於頂級甲級寫字樓,但要處理一單數以十億元計的Deal,其實往往都係一條得幾個人的團隊。而投行裡面有唔少幾個人的團隊,而且 (Ideally) 互相良性競爭鬥業績。

雖然投行Banker (front office) 年年袋袋平安以「球」計的收入與花紅,但假如返唔到數,一樣會炒人需要另謀高就。因此,投行呢種Businss Model,只要經濟活動 (ECM, DCM, M&A 等等) 維持正常增長,就算要比投行Banker天價收入,一樣年年賺大錢,因為一個Banker的天價收入背後,往往就係幫公司賺左天價收入 3x – 6x的超級利潤。

如果咁好賺,咁點解無更多人開投行分一杯羹?

主要係因為呢個確實係哥 Imperfect competition的市場:在巨額融資市場,訊息普遍不透明,基本上第一手「市場消息」只能透過人際關係及專業關係的信任而取得。而且,正如以上所所講,做投行Banker需要嚴謹而系統性的長期訓練,唔係人人做到,而且非常Technical亦唔係賣樓咁簡單。

SJ結語

由此可見,做投行 (如果市況好而且Run得順) 係可以賺好鬼多錢,而且有經驗而Well-trained 的Banker在市場上亦非常難得,所以大量獵頭公司以靠呢行搵食:幫投行A從投行B/C/D/E 撬某極度專注某職能的Banker過來 。

呢個基本上就係投行個Business model,未必所有行業裡面最賺錢 (大把真正暴利行業,而投行歸根究底亦只係賣時間而已),但肯定係著西裝的行業裡面比較好賺的行業。

【延伸閱讀】中環人的8個人生無奈

【延伸閱讀】中環人打扮攻略 女神忌穿4吋以上「斗零踭」

【延伸閱讀】揭「喜茶」爆紅之謎  90後創辦人:今年要開夠100間店

全文刊於「Stealjobs」facebook,文章獲授權轉載