地盤管工賣蠔滾出每月600萬營業額

職場 12:41 2017/11/03

分享:

由一隻生蠔開始,從網店發展成樓上舖,再變成高級食材連鎖集團OCEAN THREE,究竟有何秘訣呢?創辦人之一何智聰(Hamish)笑言,其實所有做生意的理論,淺白如「阿媽係女人」,且在重要關頭救他一命,成就他攀到今天高度。

本為地盤管工的Hamish,2008年創業,先在eBay賣電子產品賺得第一桶金,金融海嘯後蝕掉半邊江山改行做海鮮批發,慘被客走數,但為與供應商保持良好關係,依然定期入貨,且想出開設網店OCEAN THREE散貨,逐隻生蠔賣起。

【延伸閱讀】Razer雷蛇上市集資最多逾40億 CEO由律師走上電競之路

逐少做 已向前大踏步

3年前,他的網店已擴展為4間樓上舖,每月生意額150萬。而無論是網上賣生蠔還是在工廈賣高級海鮮,對當時的香港人來說都是新鮮事。故當年這門獨市生意增速驚人,賣半年生蠔已賺回被騙的100萬。

3年後,他的分店已由4間變7間,亦由賣生蠔為主,發展成集凍肉海鮮、甜品水果、海味及酒品於一身的食材店,每月營業額升至600萬,且亦開始進駐地舖。

一向主打樓上舖的OCEAN THREE,兩年前轉戰地舖。(相片來源:iMoney智富雜誌)

問及當中竅門,Hamish表示:

生意理論都只不過係『阿媽係女人』,差在你有幾信、幾努力去實踐。

第一個理論叫「Done is better than perfect」。Hamish自言做事無計劃,當年成立OCEAN THREE也沒甚麼願景,只知每天要盡力解決問題。近幾年網上銷售食材的競爭激烈,連帶鎮店之寶生蠔的銷量也跌,促使他每天不停諗計應對。

每想到有甚麼是香港人必食的產品,就立即搜購回來試食試賣。此外,還針對不同客群反覆考量。如他發現女人除了扮靚,最捨得花錢就是甜品,於是又從各地找來特色甜點,最終令甜品由兩年前佔整體銷量0.3%,升到今天的8%。

諗到解決辦法,計掂數就要立即Take action,逐少逐少做。過後回頭望,你會好驚訝原來自己已經向前行咗咁多步。

OCEAN THREE創辦人之一何智聰(Hamish)認為想到問題解決辦法,就應立即行動,一點一點去做。將來回頭一望,就會發現自己原來已向前走了很多步。(相片來源:iMoney智富雜誌)

【延伸閱讀】80後更生人士創業開日本放題 每月營業額500萬元

分析數據開分店 擴大客群

話說當年首間位於葵涌的總店經常迫爆人,於是他根據網上定單的送貨地址,找出最多人訂貨的地區開分店,最後選址觀塘和鰂魚涌。「呢個小故事說明,做生意一定要睇數據!」

近年由樓上舖轉戰地舖,也是靠數據。

我哋Facebook有10萬個Fans,當中8成係25至35歲,呢批人最鍾意試新嘢,所以造就到開業初期一個小爆炸,但當新鮮感過後,生意就可能無以為繼。但數據另一面,其實反映咗我哋阿爸阿媽個輩,完全唔識我哋。

為了開拓這片藍海,OCEAN THREE由去年在荃灣及屯門兩地開設街舖,專選街市附近當眼位,吸引及教育較年長人士,結果成功將客人的年齡擴展至50歲以上,且發現這批客才是最能持續消費一群,帶動整體生意額上升20%。

過程中,他還發現一個有趣現象。

點解呢班人咁buy我哋?係因為仔女。好簡單,如果你阿媽同你講:『我買咗生蠔,你今晚返來一齊食啦!』你動力係咪即刻大好多先?所以即使一餐家常便飯,佢哋亦唔介意400蚊買隻鮑魚,只係希望阿仔阿女返屋企食飯。

【延伸閱讀】23歲開餐廳每月營業額20萬:年輕人最緊要有目標【有片】

出席社交場合 谷公司人氣

現時Hamish一星期仍做足7日,經常到處飛,找新產品。每隔幾日就要吃完放滿一張長枱的新舊產品,作出採購決定。

我到依家都仲會親自邀請採訪,不停去商界聚餐識人搵機會,每兩星期開Talk,靠同人直接溝通Keep公司人氣。

他說了一個勤力就事成的例子,

有次牙痛,打算唔去個聚餐,但又諗,去唔去隻牙都痛,於是迫自己去。當晚識到個CEO,傾開想將生蠔打入某某飲食集團,原來CEO同集團老闆係好朋友,佢二話不說就幫我穿針引綫,結果現時集團所有生蠔都係由我供應……我只可以講,堅持付出唔一定成功,但唔付出就一定無收穫。

Hamish不諱言,生意難做。「以前做100蚊生意,利潤可能有40蚊,但現在競爭激烈,大家鬥平,舖租人工不斷升,利潤得返20蚊,所以就算做到雙倍生意,利潤都無變過。」盡管如此,Hamish仍然覺值得。原因是他對未來高級食材市場甚為睇好。同時,他認為做人和做生意都一樣,

好玩就在於有時打順境波,感受呼風喚雨成功感;有時又打逆境波,體會克服困難滋味,咁先係有意義嘅人生!

原文刊於第523期《iMoney》

撰文 : iMoney智富雜誌