Executive Mommy:職場上總有幾個馬屁精擦鞋友

職場 16:59 2017/12/04

分享:

職場上總遇到幾個馬屁精、擦鞋友,不過肯定有高低手之分,前者擦鞋擦到人神共憤,令人作嘔,手法之低簡直令人連隔夜飯都嘔了出來,但後者卻擦得較有深度,語言兿術除了達到大師級,行動上亦身體力行,皇上鍾意跑馬拉松,市場部阿頭Patrick就跑勻全世界,老細鍾意食好東西米芝蓮,Patrick不怕荷包流血,食勻全港米芝蓮星級餐廳,只求與老細有共同話題,共同興趣。Patrick那麼勤力地擦,Executive Mommy自愧不如,因為我寧願陪阿個女去多轉迪士尼,或者去Time Square入貨換秋裝。

Executive Mommy打滾職場多年,見盡不少擦鞋友,最經典非阿John莫屬,某日同皇上meeting,皇上叫大家腦震盪拋點子,Mary以為是學際常識問答比賽,一支箭搶答,當Mary攻勢未完,John笑淫淫地說:「Mary 你條蹺唔太得囉,依家做trend唔係咁行!」

阿John以為贏得皇上掌聲,豈料皇上答一句:「Why not?阿John 你唔好咁快否定晒所有可能性,其實可以試吓!」不得了,皇上一句話,可以360度徹底扭轉阿John的立場,Oh my God.

阿John以光速回應:「老細就真係老細,諗嘢好獨到,但方法係唔錯,Why not?」然後將Mary的建議,重覆一次當成自己的idea。在場各部門的頭目對John的拍馬屁及擦鞋低劣手法已經感麻木。

Mary在公司算是實力派,加上其交際手腕,坐正皇上福將之位。坦白說,好說話人人鍾意聽,聽到令人飄飄然,Mary幾乎每次開會都有潛台詞﹕「皇上英明同奴才遵命」

以下就是Mary歌頌皇上對白,各位不妨參考參考: 

1. Such a good idea
2. 係嘅! 係嘅!
3. Wonderful!
4. 老細你真厲害!
5. 真的諗唔到呀(眼神要配合)

或許你會不屑擦鞋友,然後坐在道德高地上,說自己如何靠實力取勝,但職場就是一個殘酷的地方,從來都是一個「識人好過識字」的社會縮影,有時拍一拍馬屁,就可以升官發財,學皇上的話﹕「Why not?」

《Executive Mommy》奴性極重,是職場上的典型夾心階層。文章獲《Executive Mommy》授權轉載

撰文 : Executive Mommy