「唔輸得」男童輸遊戲會打人：我最開心就係贏

六歲男童，無論玩什麼遊戲，都一定要贏第一，如果輸給別人，就會大發脾氣，甚至出手傷人。

家長：「我都唔係好明，佢係啲生活細節上乜都唔輸得，着衫食飯又要贏你，行步路又要快過你，搭𨋢又要爭撳掣，就算連飲杯水都要自己嗰杯多過你！」

我：「小朋友重視輸贏都係其中一個發展階段。不過如果過份咗，都要幫佢搵出背後嘅原因。咁你當時有咩反應？」

家長：「梗係叫佢唔好爭啦，爭咩啫？如果佢讀書有咁好鬥心我就安落晒啦！ 」

我：「似乎小朋友嘅成績仲未符合你嘅預期。......咁你估佢介唔介意自己成績比人哋落後？」

家長：「我估佢應該介意......我成日提佢讀好啲書，係將來出嚟社會基本入場券呀嘛，跟住佢就好似好唔開心咁樣！」

我：「你覺得小朋友而家喺學業上嘅定位，比其他層面重要啲。」

家長：「咁個個家長都想自己仔女讀到書㗎嘛，都係為佢好啫。」

我：「我相信小朋友有上進心嘅，不過佢學業上仲未建立到成功感，因為相對要好耐，仲要付出好多努力同堅持先有Feedback；即係你所謂嘅「社會入場券」。佢有機會不斷透過其他層面例如「一定要贏」、「我要第一名」去肯定自己，證明自己，因為即時得到成功感同回應嘛。講得白啲，佢係自信心不足。」

家長：「咁點算？」

我：「一個舉重選手，如果終極目標係希能夠舉起100磅，但暫時只可以舉起60磅，佢點樣令到到自己達標？」

家長：「幾磅幾磅咁加上去，慢慢嚟囉。」

我：「即係循序漸進......你已經捉到個重點。」

家長苦思良久，然後說：「咁.........會唔會我自己嘅期望太高，令佢覺得追得好辛苦？」

我:「你覺得呢？」

家長：「..........我聽過人講：同佢玩遊戲，我輸多啲俾佢，等佢多番啲自信心？」

我：「某程度上係；但又唔完全係。」

家長：「可唔可以解釋得具體啲？」

我：「自信心，肯定來自鼓勵。小朋友係Learn by Experience , 非 Learn by Explanation。」

家長沉默不語。

男孩來到治療室接受治療，他無論玩什麼遊戲都一定要贏，例如擲飛鏢，當未能命中紅心時，他都會找籍口：

孩子：「而家邊個將飛鏢掉落地下或者出咗界先係贏！」

我：「唔.....你突然改變遊戲規則，似乎「贏」，對你嚟講係好重要。」

孩子：「總之你唔可以贏！」

我：「咁你贏咗有咩嘅感覺？」

孩子：「超開心！我最開心就係贏。」

我：「原來係咁。」

然後我把所有分數全數給他。

我：「我已經將所有分數比晒你，你而家會唔會好開心？」

孩子沉默，覺得有點無聊。

孩子：「我唔要你啲分數，我自己攞啲分數！」

我：「好啊，你似乎覺得靠自己努力爭取好玩啲喎。」

後來，孩子会偶爾命中紅心，我會向他請教。他才是專家。

我：「你係點做到㗎？」

孩子：「你隻手要擺高啲，瞄準，眼同手同紅心成一直線先得㗎。睇住我！.......你試多幾次就得㗎啦！」

孩子不斷示範，我不斷接受指導。之後孩子研究出容易命中目標的技巧。後來孩子慢慢不再把焦點放眼在命中紅心與否了。

如果你故意讓孩子勝出，他會感到太無聊，結果會失去動機。重點在於讓他們明白自己在「過程」付出的努力，而非着眼於「結果」的成敗得失。許多時候我們曾不經意的說：

「睇邊個快啲？睇吓邊個高分D ?」

「勇敢啲啦，有乜好驚啊？」

「俾啲心機，努力啲呀！」

「睇唔睇到啊，好似我咁樣做咪得囉！」

其實這些說話都矮化了孩子，除了會打擊自信外，還會令他們不斷尋求外界肯定，着重輸贏。

兩個月後，家長對我說

家長：「佢冇咁再着重輸贏，而且做嘢會堅持咗，你係點樣教佢，咁神奇？」

我：「其實我無「教」佢，係佢「教」我先啱。」

孩子除了感受到一分耕耘一分收穫外，其實更加體會到「耕耘」本身就已經是「收穫一部份」。

Child Lead，就是秘密。

文章獲葉偉麟 兒童行為情緒治療師授權轉載。