復活節親子好去處 馬會嘉年華化身小騎師試騎小馬
親子
發布時間： 2018/03/01 11:15
最後更新： 2020/05/18 12:46
▲ 香港賽馬會在復活節舉行「同心同步同樂日」，小朋友可以在場內試騎小馬。
復活節有4日假，諗好去邊玩未呢？黛安留意到每年香港賽馬會，都會喺復活節舉行「同心同步同樂日」，當然今年都唔例外啦。小朋友仲可以喺場內一嘗騎小馬的滋味！
超過70項活動
一年一度嘅「同心同步同樂日」已經踏入第4年，今年同樂日喺3月30日至4月1日，於沙田馬場及彭福公園舉行。場內有超過70項寓教育於娛樂嘅遊戲同活動。除咗馬術表演，今年亦新增咗多元化感官遊戲、戶外教室等活動，真係啱晒一家大細復活節假入去玩呀！
公關姊妹仲話，今年新增咗「飛翔教室」，畀小朋友及家長喺彭福公園設立嘅戶外教室上堂，以創新教育模式學習STEM及藝術等；又增設「同進多元體驗」感官遊戲，如鏡子屋同巨炮製造機等。適逢復活節，大會亦設有多個應節遊戲，畀大眾同家人朋友歡度佳節。
同往年一樣，場內設有駿馬園、互動區等5大主題區域。如果想一嘗策騎小馬嘅滋味，買咗飛嘅朋友，可以喺3月16日前在網上登記，參加抽獎以獲得小馬策騎券。另外，大會仲請來曼聯名宿白賴仁笠臣（Bryan Robson）同大家一齊踢波，精采節目多到數唔晒！
「同心同步同樂日」詳情
地點：沙田馬場及彭福公園
時間：30-31/3上午10時至下午6時，1/4上午10時至下午5時
門票：$60，1/3上午10時起於Ticketflap電子售票網發售
