黃子華最後一次棟篤笑 子華神夭心夭肺愛情金句回顧

休閒 12:21 2018/03/26

分享:

黃子華《金盆𠺘口》最後一次棟篤笑

黃子華最後一次棟篤笑!子華神在上周五(3月23日)宣布,在7月舉行的2018年黃子華棟篤笑《金盆𠺘口》後,便收咪不再做棟篤笑,令一眾子華神粉絲震驚兼大感可惜。其實黃子華棟篤笑不但好笑,還具滿人生哲理,黃子華棟篤笑的金句,往往令人再三回味,比如講愛情,句句夭心夭肺。

1.點解愛情係一件咁困難嘅事呢? 因為愛情唔係part-time。你唔可以話:「愛?做完咪走囉!」愛情係一盤生意,你要24小時諗住佢。人咃地放假或過年過節,你更加要開OT添,行花市啦、行海旁啦、睇戲食飯....

2.好多人結婚,最初就以為自己係婚姻嘅用家。後來先發覺自己係感情嘅炒家,於是想離婚。但係離婚又要攪幾年,睇住周街都係新盤靚盤,自己個盤又放唔出,幾難受。

3.有冇考慮結婚?咁就要向公眾交代,咁就即係上市啦!所以,「中學生應否談戀愛」唔係問題,問題係「人類應否有兩份全職工作?」你再拍拖,需要知會你老闆:「老細,我出面搵咗份戀愛,我真係好需要呢份戀愛,不過公司嘢我會照做,我兼顧到。」然後你老闆會話:「咁你不如搵多份愛情,咪直情唔洗番呢分工囉!」

4.一個男人點都會hurt過一兩個女人。但作為一個女人,一世未界男人hurt過,咁就係真正嘅hurt喇。

5.依家啲人溝女,對條女最大嘅要係乜?唔係靚,最緊要,係夠新鮮!乜嘢叫做夠新鮮?就係話、溝咗一年嗰個,就唔夠溝咗半年嗰個咁正。因為半年嗰個新相識,新鮮啲。同樣,溝咗半年嗰個,就唔夠三個月咁正。溝咗一個月就唔夠半個月嗰個咁正。溝咗一日就唔夠半日咗個正,如此類推,終於溝咗嗰件,就唔夠未溝果件咁正!咁即係點呢?仲溝唔溝好呢?一溝,就唔正!

黃子華楝篤笑《唔黐線唔正常》(經濟日報圖片)

6.男人喺愛情上係要求新鮮,女人對愛情最大要求就係保鮮。

7.第一次戀愛之前,我嘅小龍女只需要一個條件,就係靚。我知,咁樣諗好膚淺,但係果陣時仲細,唔知道原來身材都好重要。

8.愛情同股票一樣,未入之前係不停咁升。但當一擁有,你就問:「點解會咁㗎?」所以世上有100分男孩、100分女孩,但就冇100分伴侶。如果仲有人唔肯承認,相處就代表開始扣分,我有個例子:兩人相愛,當然唔想有第三者,但點解你想生仔?「仔點會係第三者呀?」仔唔係人呀!喂,呢個第三者占你哋好多時間!呢個第三者,一日食六餐,隨時食埋你果份,「咁一男一女就梗係要生仔㗎啦!」係囉!點解呢?因為當世界只剩下一男一女,得番你同我,你就feel到,呢個遊戲係唔玩得耐。

9.化妝就係你落咗妝,我仲認得你,你落咗妝,我唔認得你,嗰啲叫做喬裝。化妝叫make up,但女人唔單止畀個make up你睇,仲要畀埋個making of你睇。

10.基本上男人係做到三個不,不主動,不抗拒,最重要我地係不負責嘅。

黃子華楝篤笑《嘩眾取寵》(經濟日報圖片)

11.唔該你失戀就唔好唱情歌啦,失戀唱情歌即係漏煤氣,你閂窗。

12.你愛嘅,得唔到;你唔愛嘅,你甩唔到。

13.聖人話:「食色性也!」錯!食同色,好唔同!一個人無論幾鍾意食,會唔會俾幾十蚊入戲院睇套《蒸氣騰騰小籠包》?

14.白雪公主,識得果個係王子,灰姑娘識得果個又係王子。有個有特殊嗜好,鍾意錫青蛙嘅女人,錫咗隻青蛙一啖,隻青蛙變出嚟嘅又係王子!有冇人諗過根本個王子系同一個人呢?根本呢個王子都不知幾花心,周圍溝女。仲無良到扮青蛙去溝添!

15.愛情之中,女人最偉大。男人嘅犧牲,就係為左追求美麗;女人嘅犧牲,就只係得到一個麻甩佬。而最偉大嘅係佢哋根本唔覺得係犧牲。

【睇更多黃子華資訊】

【延伸閱讀】黃子華棟篤笑《金盆𠺘口》開售 回顧子華神棟篤笑經典人生金句

【延伸閱讀】黃子華金句語錄:講得出「好鍾意返工」一定鬼上身

【延伸閱讀】黃子華由絕處到子華神 棟篤笑場場爆滿的神話

撰文 : 司徒家傑 TOPick記者