人生保健大事要食得瞓得 從不失眠的陳淑蘭:沖個熱水涼更易入睡

健康 18:28 2018/04/19

分享:

陳淑蘭說,沖一個熱水涼有助入睡,解救失眠。

人生保健三大事︰食得!瞓得!屙得!除了第三樣之外,其餘食同瞓,真係難我唔到!我的人生失眠次數,應該不會超過20次。

點解陳淑「豬」咁瞓得?根據失眠研究調查顯示︰自我要求過高、生活過於嚴謹、沉默寡言的人,都較容易成為失眠一族。我完全沒有以上的問題,兼不常常用腦,所以一瞓上床,五至十分鐘已可進入夢鄉。

但人生總有失手之時,搞到我有失眠的慘痛經歷,真的與諗嘢扯上關係。那時候我的身體已經極疲倦,明明很眼瞓,腦袋內的電波卻非常澎湃,不想諗的畫面偏偏不停浮現,令我的雙眼瞪得大大,簡直似撞邪一樣!

持續了幾天,到差點崩潰發癲的狀態時,給我發現那罪魁禍首原來是放在床邊用來辟邪,結果卻令自己撞邪的紫水晶!我即時扔掉像炸彈一樣的紫水晶後,即刻趴上床像死屍般昏睡了。

所以,瞓覺前,盡量避免大腦處於過度興奮或緊張狀態,可以的話,用體溫降低法,沖一個熱水浴可以令你更易入睡,這是日本睡眠專家永松俊哉說的。

人的深層體溫愈低會睡得愈好。深層體溫是指腦部及內臟的溫度。當體溫升高後大腦會下令溫度從手腳散發,深層體溫會迅速下降,令你容易睡得好。

另外,亦可以嘗試自我催眠,「攤」上床後,在心裏默唸︰「我好攰好攰,好似粒冰咁溶化、溶化……」瞓唔瞓到,真係要睇你造化。

如果你繼續眼光光等天光的話,我除了寄予無限同情之外,再建議你多飲玫瑰花茶幫你疏肝,花旗參茶幫你益肺,煲雪耳幫你滋陰,至少可以有助紓緩及改善唔夠瞓所帶來的後果。

【延伸閱讀】拆解睡眠飲食宜忌 吃香蕉可KO失眠

【延伸閱讀】食慾不振又失眠?抑鬱測試計分表

原文刊於《晴報》,標題經TOPick修改,晴報facebook

撰文 : 陳淑蘭