當坐月遇上麻煩奶奶 陪月給奶奶的忠告:勿逢事必反

社會 18:40 2018/04/19

分享:

70後陪月Yvonne提醒,新手媽媽坐月身心俱疲,長輩勿「逢事必反」,添煩添亂。

「陪月辛酸。血。淚。屎」繼續掀起網上熱話。70後陪月Yvonne本月初在facebook開專頁「陪月辛酸。血。淚。屎」,記下她當陪月期間見盡不同奶奶的麻煩事,希望用作警惕自己,將來少給兒女、新抱添麻煩。Yvonne給天下奶奶的忠告是,新手媽媽生產後,其實身體及心理上尚有很多負擔,若長輩再「逢事必反」,會加重媽媽的憂慮。

Yvonne指,聘請過陪月員的媽媽都會明白有陪月的需要性,

新手媽媽需要的是徹底休息,且上一輩很多想法已不合時宜,例如以前覺得只有窮人才會餵母乳,而不知產婦泵出被稱為『黃金初乳』的人奶,才對BB最有營養,長輩不宜『逢事必反』。

她舉例,有些長輩希望BB用尿布,認為紙尿片浪費金錢,但現時無論是衛生上,抑或是人手上,根本無法安排。

70後陪月見過不少麻煩奶奶,最常見是掛在口邊說「沒人奶便餵奶粉」,怕餓壞愛孫。(梁偉榮攝)

【延伸閱讀】陪月遇上懶惰媽媽「血淚屎」 陪月:推入房門屎味加臭味攻鼻

Yvonne在fb「陪月辛酸。血。淚。屎」帖文《麻煩奶奶3》原文如下:

事前顧主太太和先生已講明,麻煩奶奶係真係好麻煩,可以回應下佢,但如果佢講太過份既說話,我可以5(唔)洗回應佢。

我第1日返工,第1次見到呢位麻煩奶奶,於是我叫佢:嫲嫲早晨

麻煩奶奶:你5(唔)好亂叫! 叫我陳小姐得架喇! 你做自己野,5(唔)需要理我!

咁我入廚房,放低餸,換件衫去睇睇個B先喇!

新手媽媽:我個胸好似塞塞地,你可5可以幫我按摩下?

我:沒問題,我入房幫你按下,有催乳作用!

麻煩奶奶:係廳按都得喇,大家都係女人!

我:個廳大風吖,坐月5(唔)吹得風㗎~(阿老爺都係廳,我真係想講粗口)

麻煩奶奶:無奶咪食奶粉囉! 5百鬆啲蚊1罐啫,買5(唔)起咩?

我5(唔)出聲,同新手媽媽入房按摩。

新手媽媽堅持抱埋阿B入房,我初頭5(唔)明,之後明晒!

半個鐘按加半個鐘泵奶,新手媽媽都泵到150ml,算好成功了!

麻煩奶奶見到支母乳,黑晒口臉:搞成個鐘得個啲啲,又黃又杰咁,飲5(唔)飲得架? 講完,起身攞起支奶入廁所,想倒左去。

我那那聲拉住麻煩奶奶:陳小姐,呢啲叫黃金初乳,有錢都買5(唔)到架! 入面既成份,比奶粉更好更多更適合初生BB!

麻煩奶奶:超! 我5(唔)識咩! 我怕你手心污糟,攞住個奶樽時會轉左啲毒入啲奶到吖!

我聽完直頭覺得阿陳小姐係有精神病!

新手媽媽示意我5(唔)好出聲,放支奶入雪柜。

於是我開始整餸。是日煲炒米茶,薑水,通草鱆魚木瓜湯。午飯:陳皮紅棗蒸雞飯,烚菠菜。

麻煩奶奶1直企在我身後,人釘人咁貼住我望實我整。

我煲落湯同茶,餸又整好晒,於是換件衫,諗住同阿B沖涼。

我入廁所開水攞定毛巾棉花,麻煩奶奶都繼續人釘人,貼住我望到實。

我抱起阿B,發現瀨左屎,咁我打算在換片枱到抹左啲便便先。點知阿麻煩奶奶,1,2,3除左阿B啲衫,連屎1齊掉左阿B落水,用紗巾抹去啲便便,再係盤屎水到洗2下,幫阿B抹臉!

我和新手媽媽2個見狀都好嬲。我忍住無出聲。

新手媽媽:奶奶,你都5(唔)會用抹完屎既廁紙嚟再抹臉喇!

麻煩奶奶:你地手腳咁慢,會冷親阿B!

我唯有夾硬抱返阿B上水,再用2條毛巾包實,請新手媽媽抱實。

我去廁所洗盤換水! 再由頭幫阿B沖過。(之後我每日都同新手媽媽鎖埋房門,係房入面幫阿B沖)

【延伸閱讀】陪月血淚史極速吸萬like 陪月:警剔自己勿做麻煩奶奶

搞1輪,開午飯比新手媽媽。

麻煩奶奶話:得呢啲咋? 無餸啱我同X先生食喎。(X先生指老爺)

我:令公子吩咐我只需要照顧好阿B同媽媽就可以了。(我塊面黑過包公)

麻煩奶奶:咁我地食咩? 你幫我去買XXX外賣!

我:令公子吩咐我只需要照顧好阿B同媽媽就可以了。(我塊面繼續黑過包公)

麻煩奶奶跟住好嬲咁走左了。。。

呢日係第1日,仲有25日捱。。。

原文刊於「陪月辛酸。血。淚。屎」Facebook,TOPick獲授權轉載