• 27°C
香港時間:2018年9月26日 星期三 03:05

黃子華最後棟篤笑解釋封咪因政治壓力 子華神哽咽:只想太平盛世做個小明星

10:32 2018/07/07

黃子華最後一次棟篤笑《金盆𠺘口》。

黃子華2018年棟篤笑,亦是子華神最後棟篤笑的《金盆𠺘口》開騷,完成今次26場便告別棟篤笑的黃子華,昨晚(7月6日)首場演出亦不禁哽咽拭淚。並壓軸唱出由自己填詞的歌寄意稱:「想喺太平盛世做個小明星。」令人感慨。

昨晚首場演出近3小時,如黃子華一早的表示,是次棟篤笑「係101%香港本土嘅題目。」當晚《金盆𠺘口》開騷前,場內大銀幕播出歷來子華棟篤笑精華,剪輯的片段多有關香港社會。

最後的片段更是《唔黐線 唔正常》內,子華對當時開騷正進行的佔領中環回應:「我希望我哋都有智慧,去保護我哋自己,不用一粒雞蛋粉碎,好唔好?」

(陳偉能 攝)

感慨香港今非昔比

到正式開騷,黃子華台上稱「封咪」原因:「今時今日喺香港做個藝人係幾咁困難,大家對顏色嘅喜好唔同啫,冇得撈啦。『佢好鍾意黃色,死咗呢條屍唔要發黑,要發黃呀!黃屍嚟!黃屍華。冇得撈啦!』」但另一方面,北上發展又會遭網民罵。

子華指,相比80、90年代,現在「香港已經唔同晒」,表示自己人生最黃金的時期,正巧是香港的最黃金時代,社會最大撕裂只是譚詠麟、張國榮兩派歌迷的分歧而已。

他又稱港人平時喜歡攞Jetso同時為善不甘後人賑災:「王晶得嚟家衛,返幫會同時亦都返教會,大家唔係聖人,但都唔係人……渣。」

故臨完場,他表態要為三件事發聲,而這或令很多人不滿,就是支持爭取同性戀合法、性工作者爭取權益,以及為陳冠希平反,並解釋為何都是成人話題,因香港黃金年代的黃金才子----黃霑,子華說:「霑叔寫《不文集》,解釋點解寫得咁俗:『為真小人爭取社會地位,不讓偽君子們霸佔了全世界。』」

最後,子華以自己填詞的歌清唱告別,唱至中途更一度哽咽:「勞碌半生忙打拼,想喺太平盛世,做個小明星,贏咗有糖,時光荏苒,也不要為君停,人生在世,真係需要能量正,幾多難關,難過,講亦講唔清,我回首望住,你個紅館至醒悟,能夠與各位喺度歡樂一笑,都算係幻海奇情。」

(以下含是次演出金句,慎入)




《金盆𠺘口》金句

「黃屍華,冇得撈啦!另一個就佢襟撈呀,因為佢個人好憂鬱,好blue。咁點解襟撈?有孝心,瀨阿爺吖嘛。瀨阿爺喎,仲唔係廿四孝之最?」

「佔中嘅口號係乜嘢呀,係『用愛與和平佔領中環』,你要佔領人哋個女,你都唔可以咁樂觀啦,剩係得呢兩樣嘢。」

「有位仁兄,喺97聽到回歸呢個字就好感動:『見到支國旗升起,感動到即刻起立敬禮,然後「哭」(普通話講)。』點解佢會敬禮?佢解釋:『因為見到國旗升起,我終於有個國家!』呢個講法我覺得好有問題。我哋唔係亡國,我哋唔係復國喎!個國家不嬲喺度!仲好歡迎你返上去!大家都知,以前喺上面,落嚟係好困難,但係喺我哋下面,上去係好容易!」

「(對於馬雲《攻守道》拍自己打贏所有高手)一個有錢人打贏晒所有高手,即係話只要肯埋單,唔怕唔夠班。」

「你去到靈堂都會見到,『靈堂範圍,面斥不雅』,咩意思?你係可以鞠躬,但真係唔好太喬裝,唔係陣間瞻仰遺容時候,你個妝仲厚過佢,咁依家都唔知邊個死咗。」

「鄧小平諗到我哋97過渡,首先應承係咩呀?舞照跳、馬照跑,即係錢照賭,雞照叫,喺歷史上有邊條條例寫得咁明顯,人類四大嗜好嫖賭飲吹准做3樣,使乜走呀?」

「一個花弗嘅明星或演員,係咪從此就冇資格做戲呢?一個花弗嘅冷氣佬,係咪從此唔應該畀佢整冷氣呢?『梗係啦佢咁花弗,會漏雪種!』」

「香港係嚴謹到,總之你有婚前性行為,你就唔可以做演員,唔可以做娛樂圈。咁公平啲,不如你取消娛樂圈!」

「邊個出嚟為陳冠希平反,邊個就係變態!係性變態!因為香港,性就係變態!」

「要封殺陳冠希,因為我哋睇咗人哋唔係公開上映嘅戲,人哋唔想畀我哋睇。佢係整電腦變咗被整蠱,但嗰班受害人『s』,變晒被告『s』,然後受審、受判,甚至『受摺埋』,仲要走出嚟認錯。而喺同時,陳冠希係教識咗全香港,『唔好亂咁整電腦』,依家你唔係聖人,你唔夠膽拎部電腦去整!」

WongTzeWah20180707_002

【更多黃子華相關報導】

【延伸閱讀】黃子華棟篤笑《金盆𠺘口》開騷 撐子華神金句回顧

【延伸閱讀】黃子華最後一次棟篤笑 子華神夭心夭肺愛情金句回顧

【延伸閱讀】黃子華棟篤笑《金盆𠺘口》開售 回顧子華神棟篤笑經典人生金句

【延伸閱讀】黃子華金句語錄:講得出「好鍾意返工」一定鬼上身

撰文 : 司徒家傑 TOPick記者

相關新聞