【颱風山竹】風災後「返工」被改為電影海報瘋傳 森美聲音演出: 為港人打氣

社會 17:53 2018/09/18

分享:

強颱風「山竹」重創香港,掀起翌日「返工」風波,森美為摸擬電影預告片聲音演出,為港人打氣。

強颱風「山竹」重創香港,掀起「返工」風波,周一(17日)不少打工仔在無車兼周圍塌樹的災難情況下,「搵路」返工,其中一幅打工仔圖越過塌樹重圍前行的照片,被網友瘋傳及改圖為電影海報,諷刺是港人「返工」寫照,電台DJ森美最新聲音演出,並以「山竹」吹襲期間的片段剪輯為電影預告片,被網友瘋傳。

森美今日也加入創作,以「山竹」襲港後災情和港人趕返工的片段,加以其聲音演出,模擬電影預告片:

打風你好驚,打完仲恐怖,『返工』,香港史上最血肉的史實,700萬市民打造7小時擠擁實境,6個鐘先出到旺角?月台上全部都係人?候車大堂全部人?售票處全部人?成條街全部人?成世未見過咁多人!唔怕成條馬路都係樹,孭個背囊跑返工。返工!尋日盛大公映。未試過提早出門口,返到公司竟然啱啱夠鐘放工,多次勇奪準時勤工獎香港打工仔傾力主演,貼心老闆互諒互讓全力互航,文員、Sales、設計、會計、公關全情投入,平時半個鐘,依家塞到懵,9月17號全城返工!

打工仔在風災後被塌樹擋路的「返工照」,被二次創作改為電影海報。(原照片為Poppy Wong拍攝)

森美回覆TOPick指,昨日(17日)見到海報覺得幽默感很強,電影叫《返工》很好笑,平時成日錄電影廣告稿,所以即刻用這背景寫了個電影預告片的稿,幫海報寫個聲音版,因為我見好多網上片段都冇聲音,所以做個聲音版,之後節目監製就剪咗個影像版放上去。

其實係幫香港人打氣,噚日都辛苦啦,用幾個鐘頭返工,我身邊好多同事係沙田出嚟都返咗幾個鐘,知道佢哋苦況。

他認為是否停工已不重要,反而更關心香港人的工作壓力,「我覺得呢度可以睇到香港人工作壓力大,如果唔係工作壓力大唔會有咁多人同一時間咁緊張返工。」

【颱風山竹】塌樹擋路返工相被喻為「年度照片」森美也讚 拍攝經過曝光

【颱風山竹】塌樹擋路打工仔苦求「俾條路行」 相片瘋傳網民慨嘆:好心噏

更多「山竹」災情【按此即看】