鄭丹瑞:不要刻意去改變自己逢迎他人

休閒 13:16 2018/10/02

分享:

鄭丹瑞堅持要做回自己。

「你知唔知未識你之前,我好驚你啊?」損友甲在吹水大會上,忽然玩針對,惹得一眾損友紛紛把吹水茅頭指向我。

「係呀,佢唔講我都唔想提,你唔笑個樣真係好鬼死惡!」損友乙搶先附和阿甲。「但係你見到自己唔鍾意的人,就算唔黑起口面,而係堆起笑容,個笑容都相當假,唔識你的人,或者睇唔出;但吾等一班損友,一眼就睇穿你!」損友甲踩多腳。

「其實你自己知唔知呢?有無試過改變下自己呢種咁黑人憎的性格?」好事之徒問我。「我又點會唔知?!」自己知自己事,奈何性格如此,試過改變,完全不習慣,因為發覺自己變了另一個人,我不要做別人,那就只好做回那個「喜怒形於色,不笑的時候樣子很凶神惡煞,但真心笑的時候卻陽光燦爛」的自己。

訓練班有個學生性格比較直率,經常有意無意得罪了人而不自知,同學、前輩紛紛叫她改變一下自己。她跑來問我︰「要唔要改改自己的臭脾氣?」我叫她做回自己,省得以後後悔。她聽我講,繼續我行我素,堅持自己的個人風格,今天,她已經是電視台力捧姐仔,她直率的性格,反而成為討人歡喜的本錢。

其實人生路上,每一個人根本就在不斷改變自己,經過這些十分輕微甚至不自覺的改變,才能圓滿自己,太過刻意改變自己逢迎他人,反為不美,而且不智。

撰文 : 鄭丹瑞