地勤遇腦退化婆婆獨闖機場赴歐洲 致電兒子拒接回家:我要搵食

健康資訊 11:17 2018/12/06

分享:

分享:

地勤在機場遇到腦退化婆婆要獨往歐洲,致電兒子,對方表示要「搵食」,拒絕接母親回家。

子曰「虎毒不吃兒」,但親情何價?今日我有好深入嘅體會……

今天在櫃枱,有一個婆婆,著住呢一身單薄嘅衫褲,揸住個膠袋嚟check in,話要去奧地利……

我:阿婆,你自己一個去維也納呀?你著咁少衫?好凍喎。

阿婆:我覺得而家好熱喎。

我:果邊得3度咋,你呢身裝束,頂唔順架,有無人接你呀果邊?

阿婆:有兩個親戚,不過唔知佢地會唔會嚟喎……

我:下?唔知嚟唔嚟?有無人同你嚟機場呀?無人同你去唔掂喎。

阿婆:你唔好打俾個衰仔,佢唔理我架!有人同我去架喇。

我:邊個同你去呀?佢喺邊呀?

阿婆:你睇佢唔到架,佢係蒙面人……

從她的手震,至天馬行空嘅對話,似曾相識,絕對有問題!同趙生完全一樣。呢個情況,經過與老闆商討,絕對無可能俾佢一個人飛去歐洲。。。而我亦嘗試喺阿婆手機搵佢嘅屋企人,或者阿衰仔……

我:喂,你好呀,請問係咪吳XX屋企人?你識佢嘛?

衰仔:佢……係我阿媽。

我:太好喇,你媽媽自己一個人,要去奧地利,又著得好單薄……

衰仔:佢有精神病!

我:咁你快啲嚟接佢走喇,好彩截得切,走左就大件事……

衰仔:佢已經影響到我工作喇!

我:咁😨,咁即係點呀先生?

衰仔:佢已經俾人拉過幾次去葵涌醫院!

我:咁又點?你阿媽嚟架!

衰仔:我都要搵食架!

我:先生,如果你唔理,我地只好將你媽媽交俾警察。

衰仔:好,我唔理架喇。

這一刻,崩潰嘅原來係我,結果淚灑機場……有人積極面對,但有人卻選擇放棄治療……阿婆個狀態,同老豆年初嘅情況好相似,呢一刻我真係好傷心,好難過,只要治療及時,其實尚可舒緩病情。

仲有,佢唔係精神病,係腦退化,認知障礙症!佢哋需要嘅,不單止醫療治理,仲有家人嘅愛!

機場的朋友,由於機管局同警察都不受理,婆婆又唔肯返屋企,如果你地見到佢,希望你地都照顧下婆婆……

文章獲老爸週記授權轉載,標題為TOPick編輯所擬。

撰文 : 老爸週記版主