大學生考8次自動波車牌「肥佬」 考路試超速衝燈又撞壆

休閒消費 16:33 2019/01/07

分享:

分享:

網民分享自己連續8次考自動波私家車車牌「肥佬」原因,當中包括沒準備情況下考筆試不合格、路試時超速、沒有打燈等。

不少大學生都會考車牌,近日有大學生在fb專頁「CUHK Secrets」分享自己第8次考自動波私家車車牌不合格,被考牌主任在路試中途終止考試,其教車師傅更稱自己「唔識教」,請她另尋其他教車師傅。

該名網民分享自己連續8次考自動波私家車車牌「肥佬」原因,當中包括沒準備情況下考筆試不合格、路試時超速、沒有打燈、沒有看倒後鏡便切線、轉彎時撞壆等。而最近一次「肥佬」更非常驚險,因衝黃燈幾乎撞到途人,更驚動了交通警。

當時交通燈正轉黃燈,事主沒有停車反而加速希望衝過路口,當到達路口時卻已轉為紅燈,考牌主任立即剎停私家車,更驚動了旁邊的交通警。但隨後再開車時卻遇上有路人走出馬路,事主只懂尖叫來不及反應,幸考牌主任及時剎車。

最後考官叫事主在路邊停車,更基於公眾安全即時終止駕駛考試,隨後叫事主讓出駕駛位置。

帖文引起網民熱烈討論,短短3天已有逾1,100個留言討論。不少網民都勸事主放棄考車牌,並稱事主「唔適合揸車,你唔夠冷靜」,更指為了其他道路使用者安全,不應考車牌「你咁樣嘅駕駛態度,反而令其他道路使用者非常危險,你真係唔好揸車,拜託」。

以下為該名網民的分享全文:

第8次考車牌自動波私家車合併試肥左,個人勁灰。

一開頭果次就因為考天才波肥左筆試。之後既考試就分別衰超速、冇打燈/睇鏡就cut線同埋轉彎撞左上壆等等。

我都唔知點解會咁。今次肥左師傅直頭叫我不如搵過第二個師傅教,佢唔識教。覺得自己好似係比個天針對咁。

今次係比考牌主任終止考試,要同考牌官調位比佢車返試場。

事源斜路起步果陣唔記得比油鬆左手掣之後比考官踩停,之後去到一個燈位果陣見到黃燈我加速諗住過埋,結果去到時變左紅燈但沖左出去又比考官係黃格踩停。隔離線個交通警阿sir都好好冇抄我。

之後都心知不妙,最後揸揸下有個行人沖左出黎,果下好突然嚇到我個腦一篇空白唔識比反應係到尖叫,最後又比考官踩停。

之後個考官叫我揸埋一邊,話基於公眾安全既考慮我而家終止你既駕駛考試,請你落車,我而家會車你返試場。

返到試場果陣D場務員、保安同埋其他考生師傅見到我同考牌官調轉左坐個個都呆哂黎手指指笑我咁。

點算好,我好唔好認真考埋下一次佢,好驚聽日同男朋友拍拖時比佢問到考成點。唉。