英國技術移民重大改革 移居英國港爸︰香港人或留學生成受益者

親子 16:08 2019/01/18

分享:

Ben與妻女移居英國,他表示英國脫歐後,技術移民改革有利香港人或留學生。(照片來源︰ Goodbye HK, Hello UK版主Ben)

因為歐盟技術人才自由出入同工作,英國的技術移民政策,於2011年停止。亦因脫歐嘅關係,英國Home office剛剛公布160頁嘅技術移民改革白皮書,將會於脫歐後大概2020年推行。我希望盡量簡單咁分析一下呢次改革,因為好大程度上呢個技術移民政策,對希望移民英國嘅朋友有相當大嘅幫助。因為現時歐盟會員國民基本上已經霸佔大部分英國外來工作人口,所以對於EU以外嘅人士,現在可以攞到T2 Working Visa嘅難度,同做太空人或者整導彈差不多。

現有制度限制多

首先講解下現有制度嘅麻煩,依家T2 Working Visa每年只有兩萬多少少嘅配額。除咗學歷技術工種要符合每年嘅國家所需要求,而僱主必需要有Working Visa Sponsorship License(全國只有三萬個僱主持有)。就算僱主有這個牌照,想聘請國外非EU員工,都要證明喺本土一段時間之內都搵唔到適合人選。

就算證明到都不能立即聘請,因為Home Office只容許每月指定時間申請。除咗技術學歷要求之外,每個工種都有年薪最低要求(£30,000或以上)。而留學生方面,依家嘅情況係就算叻到搵到有T2 Working Visa嘅工作,一般情況下,除非另外申請延期,否則畢業後兩三個星期就要離境,先返祖家申請T2 Working Visa,成功咗再入境。原因好簡單亦都好僵化,因為學生簽證一般情況下,並不可以自動轉變成工作簽證。

(要留意嘅係下面所講嘅改革係唔包括公司內部調配嘅T2 Working Visa (Intra Company),亦即係話呢個種類嘅工作簽證要求依家不變,同時無論做幾耐都唔會落到永久居留或者入籍嘅權利。)

新制度無配額及時間限制

因為脫歐後,對歐盟人士嘅入口工作再沒有優待,變相造就咗呢個包含所有國籍人士嘅技術移民改革,某程度上應該有唔少香港人或者留學生可以成為受益者。首先將來唔會再有每年嘅配額限制,僱主亦再無聘請時限(幾時請都得),亦講到明無國籍優先,關心嘅只係學歷技術同專業機能。

The future system will be based on principles that help to define high skilled – salary levels, qualifications, skill levels – and not nationality.

另一個重大的改變,就係學歷技能嘅最低要求。新的技術移民政策之下,最低嘅學歷要求係A-Level或以上。而工種方面,就由商業機構中層管理級別(亦即係Managerial Grade)開始,即係稱之為RQF 3 (Regulated Qualification Framework 3)。

Working Visa Sponsorship License呢個制度仍然有效,即是申請人必需已受有牌照嘅僱主聘請才可以申請。但僱主申請這個Sponsorship Visa License 嘅程序亦有所改變。白皮書提到,明白都有啲僱主或者中小企,未必有資源或者經驗去申請同處理呢個牌照,所以將會有特別簡化嘅措施,專門畀中小企申請Working Visa Sponsorship License。

更重要嘅係有呢個牌照嘅僱主,唔需要再證明喺本地請唔到相關嘅人才。有關員工可以帶埋家屬去英國,最開心嘅係個老婆或者老公無需另外申請簽證就可以喺英國工作。可惜,其中無變嘅就係每年嘅薪金要求仍然係£30,000,呢個係要保障國內薪金嘅穩定。

英國留學生有6至12個月搵工

咁最後一個改革,就係關留學英國嘅學生事。呢個係英國賺錢教育問題,因為依家所有攞留學簽證嘅學生,一般情況下,讀完書就即刻要走(除非特別申請留多幾個月)。既無時間搵工,搵到亦都趕唔到就地轉為工作簽證(因為僱主要證明比較多嘢)。

今次個改革講明,學位或者碩士畢業生,畢業後有六個月時間可以留低喺英國搵工,而博士生就有十二個月時間。呢個睇嚟好似好合理好簡單嘅放鬆,其實張上面嘅嘢加埋一齊睇,就知英國政府好明顯想吸納同留低更加多人才。

香港居民可以遊客身分搵工

有一樣純粹個人推測同估計,可能特別與香港人有關。因為白皮書裡面提到,會容許一啲同英國有特殊關係或者合作嘅地區居民,可以用遊客嘅身分搵工。如果搵到的話,個旅遊簽證可以唔使返祖家就可以變成工作簽證。而香港咁啱就係英國同八個其他國家合作互換所謂嘅Working Holiday年青人嘅其中一個。無論本人係啱還是錯都好,香港嘅年青人如果有機會去英國Working Holiday,係咪應該借機會探索一下與僱主嘅關係同工作機會,希望將來可以受聘為技術移民呢?

We intend that nationals from specified low risk countries, including those with whom we have reached a specific agreement as part of bilateral negotiations, should be allowed to look for work having entered as a visitor and apply to switch into the skilled worker programme. 

其實呢份改革嘅白皮書,主要嘅目的就係講解Brexit後EU人口唔再係自由流動,無掩雞籠咁免簽證工作出出入入,控制唔到移民人口同質素嘅處理方案。那怕寬鬆些少,至少都係國家內部可以調控。至於已經喺英國生活或者工作嘅EU人士,如果需要申請家人黎英國,就會同所有家庭團聚嘅方法一樣。

The UK's Future skills-based immigration system white paper原版下載

Goodbye HK, Hello UK版主Ben曾經只係一個貪威識食嘅香港「偽中產」,因為一萬個理由,任性地離開香港呢個唔多Comfort嘅Comfort Zone,回到英國生活。分享由香港生存到英國生活,當中嘅每一個細節與日常。

【更多Ben的故事】

中產爸爸帶4歲女兒定居英國:我情願女兒擁有一種地道的英語水平
偽中產爸爸受夠港壓力到英國生活:不希望女兒重複我的生活
移民英國要全家快樂 港爸:在香港永遠賺不夠錢
港爸移民英國鄉郊過真生活:不想女兒只知道錢和樓

 

撰文 : Goodbye HK Hello UK