【屯門好去處】尋找隱世屯門唯一粉艇　$28足料懷舊艇仔粉

3個月前， 我們第一次試過在香港仔致電流叔（流記艇仔粉）, 食過令人難忘的艇仔粉後, 有朋友告訴我。

喂！屯門都有㗎喎，你不如去試埋啦！

於是我在狗年年尾致電屯門碩果僅存的粉艇艇主黃太。

我同我先生做咗40幾年, 依家都半退休㗎啦, 所以唔係成日開, 過咗年啦, 不如你新年之後再打畀我睇吓, 好唔好？

於是心急的我, 初六便問好黃太，初七便約同子子，齊齊去三聖食艇仔粉！地膽魚子媽一齊去。

我住咗喺屯門三十幾年……無無無……廿幾年，三聖食海鮮就久唔久嚟，但係艇仔粉就真係唔知道有喎！

▲ 在三聖輕鐵站，沿豐漁樓、青山冰廠方向走。（相片來源︰大仁生活）

既然如此，我們便約同在三聖輕鐵站等，沿豐漁樓、青山冰廠方向，走去青山灣海濱長廊找黃太吃地道風味艇仔粉！

▲ 青山冰廠。（相片來源︰大仁生活）

兩個小朋友嘻嘻哈哈，由輕鐵站走約3分鐘便大叫冰廠呀！ 再走1分鐘便已經到達長廊入口，於是我即時致電黃太。

▲ 想吃艇仔粉，記得預約。（相片來源︰大仁生活）

企喺嗰三隻大船前面條樓梯等我啦, 你食過未㗎？ 

我表示未呀，是專登由旺角入嚟試黃太手勢。而黃太十分謙虛。

吓！ 你旺角入嚟？ 我啲嘢好渣㗎。

▲ 海上小艇專賣的粉麵食就是「艇仔粉」。（相片來源︰大仁生活）

大約5分鐘，黃太的艇來了……艇仔粉$28一碗，我們選了一碗河粉及一碗麵。

你要咩餸呀？燒味、叉燒、紅腸、雲吞、魚蛋。我哋啲湯用大地魚加燒豬骨煮㗎， 你哋試吓睇過。好彩你打畀我，因為我哋今日（年初七）先開返。

所以大家想找黃太食艇仔粉，記得電話預約先會比較好， 避免撲空！

▲ 粉艇艇主黃太跟丈夫賣艇仔粉40多年，現時半退休。（相片來源︰大仁生活）

▲ 足料大大盒艇仔粉只售$28。（相片來源︰大仁生活）

我們今天非常失策，因為忘記自備餐具，但沒有想到黃太的$28艇仔粉會大碗得如此抵吃。

魚子媽以為好似街邊食豆腐花。

食完畀返隻碗佢，原來唔係。下次我哋識自備餐具喇，不過，佢盒粉真係好大碗，又多菜，好健康， 好抵食！雖然頭先佢話以前先係自己做燒味，依家係交貨嚟，但佢哋都揀得好正，啲叉燒係有燶邊，仲係半肥瘦添！

SY很喜歡吃，表示黃太的叉燒好食過太興……

▲ 大家都食得好滋味。（相片來源︰大仁生活）

我認為魚蛋好入味！魚子媽再大讚黃太的艇仔粉。

佢可能知我哋唔係即刻食，所以啲粉麵唔會煮到好腍，麵仲幾彈牙，同唔重鹼水味。講真依家食碗車仔麵都40幾蚊，黃太賣$28真係超值！

▲ 大家可坐在海濱長廊邊的椅子吃艇仔粉。（相片來源︰大仁生活）

▲ 青山灣海濱長廊。（相片來源︰大仁生活）

坐在海濱長廊，慢慢嘆艇仔粉，除了享受，就是舒服，好嘆……真心推介大家要來試一試充滿風味及好好味的黃太艇仔粉！

屯門粉艇
地點：三聖邨碼頭冰廠隔離
電話：9237 8244
備註 : 記得電話預約，避免撲空

文章獲大仁生活授權轉載。