深夜才是媽媽的專屬時間 全職媽媽:黃金時間都花在湊仔

親子 15:57 2019/02/21

分享:

深夜當孩子睡後,才是媽媽的專屬時間。

深夜未眠,有感寫下這篇文章。

身為媽媽的你我,一樣越夜越精彩嘛?

其實未訓的原因,倒是因為做了媽媽之後,好像永遠有無數事情等著我去做,而且這些事情會無限Loop,永遠做不完。

數來數去無覺好訓,時間都是花在子女身上多,可以追溯到陀B那刻開始,每晚不適/痛楚/手腳腫痺/抽筋,就已經令人無法入睡,長期失眠。

相反地到BB出世後頭幾個月,每晚都好眼訓,但每晚都無得訓,餵奶泵奶換片……BB哇叫就要起身安撫,BB靜下來就要standby ,總之BB有點聲音,第一個彈起床的一定是自己,搞不好還要抱天光。

到他們大些,的確易湊些,但又有另一堆事情會纏過來,未到返學年齡的,就要陪玩陪食,要返學的,就更要滿足埋他們學校的要求。每日最值錢的黃金時段,全部都花在家庭及湊仔上,直到好寶寶終於沖好涼安然入睡,每日才告一段落,彷彿一身兒女債。

償還完每日的利息,才可好好計劃自己的開始,首先要做的,好大機會是補做日頭未完成的大小家務,無法理解總會有堆未執未整未處理的事,明明今晚想早點沖涼睡覺,又或者浸個浴敷個mask,忽然全部都變得好奢侈,這些機會多數都要挨近12點才可發生。

有時不甘心一日就這樣子過去,所以會安排自己進行謹餘的嗜好,但夜闌人靜可以做的,都只局限於網購睇劇寫文章,不過好多時都會換來旁人甚至乎老公的標籤,覺得留係屋企認真嘆世界。

日日係屋企有咩做?吾悶既咩?

呻攰吾訓咪又係玩手機睇電視…諸如此類。

其實我好想吐一句,因為BB出世後,每天已習慣了打醒十二分精神,所以再攰都不易入睡。

回想做全職媽媽其實都有點呻笨,雖然沒有工作上的壓力,體驗不到返工的緊張與放工的疲累,但有苦自己知,要工作的媽媽或者也好不到那裡,好大可能也是為分擔家中開支才交托出子女,家家有本難唸的經,不過為的都是給下一代建立個快樂家庭,繼而不斷出現取捨與犧牲。
 
凌晨01:00了,可能媽媽們你剛餵完奶,泵緊奶,又或準備完小朋友明天的早午餐他們的書包……

完成後大家的指定動作,都一定不會忘記再三望過自己的寶貝,肯定了他們正在甜睡,被子蓋好,才來開始自己的人生。

撰文 : 許許與小BELLA