巴士阿姐長期霸佔座位當床瞓　網民拍片揭自私行為：你晚晚都咁搭車

打工仔日忙夜忙，趁坐巴士的空閒時間補眠可以理解。本港有網友拍攝到一名長期搭277X巴士的「巴士阿姐」，經常以座位當睡床，橫躺於雙排座位，甚至跨越中間走廊連霸4個座位，行為極度自私。

有網民日前將影片上載到「Fanling 粉嶺」facebook群組，表示星期三（20日）晚上8時45分，「巴士阿姐」如常出現在開往九龍的277X巴士上最尾座位。據樓主說，這位中年女乘客長期乘坐此班次巴士前往九龍方向，每次她都橫躺在座位上當睡床。當晚她身穿行政套裝，脫鞋後把它放置座位下方，並以背包充當枕頭，橫躺上層尾排座位玩手機。

據影片所見，樓主曾經跟「巴士阿姐」表達意見，唯她依然我行我素玩手機。

呢度係坐唔係瞓，我已經幾日見到你喺呢度，你頭先打尖我都已經冇出聲㗎喇已經。搞錯呀你，你隻腳好乾淨呀而家？你唔好扮聽唔到呀，錄緊你呀而家！你晚晚都係咁㗎搭親車，有冇搞錯呀你真係！

樓主其後通知車長處理事情，「最後通知車長上嚟小佢，佢仲話冇瞓，好彩我拍咗片有證據。」無奈在車長離開後，「巴士阿姐」便坐起來連霸兩座位，又將腳放上其中一個座位上繼續玩手機。當樓主準備下車時，「巴士阿姐」也不甘示弱，拿起手機反拍他，樓主表示無所謂。

佢臨落車都有影我，但我光明正大，你咪影飽佢囉！

樓主又放上幾張在不同日子所拍攝「巴士阿姐」的照片，原來樓主已經多次看到她自私佔用座位的情況，這次是第5次看到她橫躺霸佔座椅，才決定放在facebook上公開事件。

樓主留言：「我前日見倒佢，我一上車已經去樓上尾排坐中間個位，等佢冇得咁瞓，點知佢走咗去車頭照喺度攤屍。」有人留言回應：「 咁樣訓舒服咩？架車急停，就大件事。」

不少網民紛紛留言，認為「巴士阿姐」欠缺公德心，說：「人無恥，便無敵」、「踢走佢對鞋啦」，更有人笑言：「有相為證，畀4位車費！」、「一除鞋就踢走隻鞋落車。順手落車搭下班。」