失智伯伯一褲大便途人只懂影相 游水教練贈新褲:香港人好冷漠!

健康資訊 10:46 2019/02/28

分享:

分享:

一位游水教練遇上一名疑有腦退化症的伯伯,但途人只拍照不幫手。

當你在街上遇到長者有困難需要幫忙,你會駐足而視、影相拍片,還是主動上前幫忙?日前一位游水教練遇上一名疑有腦退化症的伯伯,一褲都是大便,在商場內無助呆站,商場內的保安未有施予援手,更揚言「再行入嚟我報警!」,而途人只是注視,甚至有過分的途人把伯伯尷尬情況拍照意圖放上網。游水教練慨嘆:「香港人真係變得好冷漠」

一名游水教練日前在fb撰文分享,他於粉嶺泳池教水後,途經一個商場時遇到一名伯伯。伯伯把身上的褲除掉一半,而褲上沾滿大便,他想走入商場去廁所,但被商場保安阻止,並揚言:「再行入嚟我報警架!」游水教練於是致電區議員及警方求助,期間有途人經過想幫忙,但都遭保安「攪得掂」為由拒絕,但游水教練稱保安一直未有報警的打算,只是一直阻止伯伯四處行。游水教練稱:「解見到有需要嘅人唔單止無人幫佢,仲要阻止人幫佢等佢自生自滅? 」

據游水教練描述,伯伯身上掛有身分證及其他證明文件。伯伯不懂說話,不會望人,只識對其他人作反應,身上衣物都很骯髒,指甲吋半長,疑似有嚴重腦退化症或自閉症。

等待救護車及警方到場期間,游水教練不忍心伯伯一褲都是大便,於是把游手後抹身的毛巾給伯伯遮蔽下身,並到附近時裝店買了一條99元的新褲給伯伯換。

最終救護車在15分鐘後到場,而警員則在議員報警後50分鐘到場。游水教練稱,經歷此事後他的損失只是一條85元吸水毛巾、99元新褲,以及1小時間,不明白為何香港人如此冷漠,不施予援手:

伯伯嘢又唔識講,最徬徨之際,唔單只無人幫佢,仲要俾人影相打咭擺上網?!見到人有需要幫到就幫,走頭無路完全無助好慘架!

以下為帖文全文:

香港人真係變得好冷漠!點解見到有需要既人唔單止冇人幫佢,仲要阻止人幫佢等佢自生自滅? 希望各位可以睇晒佢,係個好好既經歷....

話說頭先係粉嶺泳池教完水,行過粉嶺名都,見到有個伯伯除咗半條褲,成褲都係屎,伯伯好徬徨咁想行入商場,相信想搵廁所,但俾保安阻止,仲恐嚇佢:
「再行入嚟我報警架?!」伯伯身上掛住身分證,不過完全唔識講嘢,但識回應,不過唔識望人,可能有嚴重老人痴呆或自閉症。有掛證証明佢係有人跟進,佢有著紙尿片,但身上衫褲都好污糟,指甲有吋半長,可能係獨居老人,每日有人送飯沖涼,但冇宿位俾佢。

跟住行過既行人個個鄙視眼光大叫好臭,忌而遠之,有個男人行過仲幫佢影相打卡添!

我即時call當區議員附近有冇外展老人服務,議助話call警察,剛巧有民政署同事放工行過,主動問保安需唔需要幫手,保安拒絕,話佢攪得掂,即係繼續阻止佢入嚟等佢自生自滅。

結果我叫伯伯等多陣,好快有人幫手,點知等咗二十五分鐘完全冇聲氣,再打俾議辦話已經call阿sir嚟幫手,我見唔對路,想搵條褲俾伯伯著住先,但又怕我行開後伯伯走咗去,咁打俾 Benson Tsang 問下意見,佢叫我再call白車,我俾伯伯坐底,搵自己條毛巾遮住伯伯,叫商場保安幫手睇住伯伯唔好俾佢走開,我去搵條褲俾佢,保安反問

「去邊搵?」

「 買囉!!」

再跑去商場買條褲俾伯伯,但商場得baleno有男人褲賣,仲要299兩條,冇一條賣,我跑到去粉嶺中心間時裝店,一樣價,我同佢講情況,店員即刻摷全間舖搵條褲俾我,搵到條次貨99蚊,除咗佢條褲,等白車嚟時可以有褲換,15分鐘後白車嚟咗,救護嚟交待伯伯生命表徵就離去,走個時約議員報警50分鐘後,警察終於到場,跟住我就冇眼睇啦。

我返去商場再同保安講,伯伯已經有人車去醫院,你可以收工啦,佢話我好好人,仲話

「個伯伯再入嚟我要報警」

「你一早就應該報警CALL白車幫佢啦!! 」

結果我今日損失既只係一條85蚊既索水毛巾、99蚊買咗條褲,同一個鐘時間。但伯伯嘢又唔識講,最徬徨之際,唔單只冇人幫佢,仲要俾人影相打咭擺上網?! 如果有人發現有邊個影咗個無褲著既伯伯上網唔該摷佢出嚟,呢個根本係人渣仲既XX,唔幫手不特止仲要幫手欺淩佢?!

原來佢仲未夠65歲,佢正係果個某黨當智囊既膠官羅致光話仲好年青好有工作能力唔應該接受福利既64歲年青人!! 睇佢個樣以為已經80歲! 恕我唔登伯伯個樣出嚟,只係影救護員算啦,希望邊個見到有人放伯伯除褲相出嚟既好好料理下佢。仲有見到人有需要幫到就幫,走頭無路完全無助好慘架!!

PS. 好多人PM我嚟對証係咪失蹤親屬,伯伯姓曾,如果年齡同姓氏都吻合既,可以再問我或去北區醫院查詢啦,亦希望各位可以快D搵返你地失蹤既親屬