一家三口夾錢供400呎樓變四人住　姐結婚姐夫遷入新屋叫母親排公屋

土地問題幾乎是每個香港人都煩惱的問題。日前有一名連登巴打發文，指與家人因住屋問題接近家變邊緣。原本一家三口由200呎搬400呎新屋，打算改善生活環境，豈料家姐突然結婚並邀姐夫遷入新屋，要求多劏一間房，又叫60歲媽媽排公屋搬走，令發文巴打非常怒氣。

日前有巴前以「我家姐突然話下個月結婚。家變」為題發文，指自己與媽媽、姐姐一家三口原本居住200呎屋，只有一間房，廳更放了一張碌架床，活動空間幾乎零，住了8年覺得很辛苦，於是一家三口夾錢供樓，遷往400呎新居，而首期則是姐姐與媽媽一人一半支付。

據巴打稱，原意一家三口住，並「以為捱咗咁耐終於可以轉換下環境，有自己嘅空間」，怎料姐姐突然稱下個月會結婚，並將會叫丈夫一同遷入新居，並要住主人房。巴打向姐姐反映，400呎住4個人、劏三間房會令大家住得辛苦，姐姐卻直言：

阿媽到60歲去排公屋好快有

此句話令巴打非常憤怒，更稱「我同家姐罵大交仲差啲開拖」，又斥責姐姐：

妳結婚要我同阿媽貼埋大床畀妳老公，樓我地有份供 無份話話事，妳兩公婆塊臉皮成尺厚，完全無考慮過我同阿媽嘅感受

巴打又補充，未來姐夫無學歷、無工作資歷、無儲蓄，工作是在街市幫媽媽看鋪，形容對方「好食懶做」。巴打又引述媽媽稱，一家人齊齊整整最重要：

我媽佢話一家人互相遷就，齊齊整整最重要。坦白講我都唔捨得家姐結婚，不過無諗過佢同佢老公今次個行為係咁賤。

不少網民都表示支持巴打，又指現在趕媽媽排公屋，日後更有機會叫巴打搬走：

劇本係老母搬走，佢地就準備生仔，巴打瞓街。

不過亦有網民明言，巴打沒有夾首期，每月供樓如付租金，理應是最無權出聲的人：

巴打，你想層樓有名，基本上一定要畀首期，你家姐畀咗一半，冇一百粒都六七十粒，果到一般人要儲幾耐？

你家姐踢你老母住公屋係Ｘ街，但嚴格嚟講你供樓只係當交租，你係最冇say嘅人。

當初根本唔應該叫家姐出首期，想女嫁出去，就留返啲資本畀人搬出去，你屈咗人舊錢，又想兩姐弟加老母一直住落去係諗下都知冇可能，唔得咪唔搬住囉，冇咁大個頭，買咁大層樓。

以下為帖文全文：

前兩個月我同屋企人（一家三口）就睇中左一個400呎左右嘅單位，之後就打算大家辛苦少少一齊供樓，因為依家一家三口住200呎都無，屋企得一間細房 個廳放左張碌架床，之後已經冇晒活動空間，仲住左八年，住得真係好辛苦，所以想住好少少。

個問題就出現
起初打算一家三口一齊住，以為捱左今耐終於可以轉換下環境，有自己嘅空間。點知天氣不似預期，我家姐突然話下個月會結婚，佢個老公仲要搬入黎同我地住，我咪話400呎住4條友劏三間房會住得好辛苦，我家姐竟然叫我老母到60歲去排公屋好快有，我嬲到一個點，我同家姐罵大交仲差d開拖。

我心諗妳結婚要我同啊媽貼埋大床比妳老公，樓我地有份供 無份話話事，妳兩公婆塊臉皮成尺厚，完全無考慮過我同啊媽嘅感受，屋企已經吾係大，得400呎 仲要劏三房，你竟敢死打算霸一間大嘅主人房，我真係完全無語。

我唔係話窮唔可以結婚，但男方起碼都要有計劃，無計劃就學人結婚，自己無學歷、無工作資歷，又要無儲蓄，咩都靠自己老豆老母，條友做個裙腳仔同佢老母睇街市鋪，好食懶做，好心你唔好害人。


 祝你今次結唔成婚