容祖兒8月紅館演唱會預備撲飛 祖兒入行20年開10次紅館騷:要令觀眾crazy

娛樂 17:06 2019/03/26

分享:

入行20年的Joey今年將於八月假紅館舉行演唱會。

容祖兒(Joey)今年將於8月假紅館舉行演唱會,入行20年的容祖兒為此特意到東京拍攝宣傳海報,容祖兒是次的演唱會由黃偉文為她定下名字:《PRETTY CRAZY》,代表容祖兒在工作上的CRAZY。

Joey特意到東京拍攝演唱會宣傳海報。

入行20週年,容祖兒今年將於8月假紅館舉行《萬通保險PRETTY CRAZY 容祖兒演唱會》,早前祖兒就特別為演唱會宣傳海報飛去東京,非常設合演唱會主題,Crazy地用24小時努力超額完成。

Joey謂演唱會名字《PRETTY CRAZY》是好朋友黃偉文為她定的,Joey稱:「個名真係起得好好,因為呢20年來無論在工作上、不同經歷上面,一路走來都真係PRETTY CRAZY!PRETTY CRAZY這兩個字,既可以代表到我們對工作上面的CRAZY,又可以代表到我們一直努力追求的優雅,簡簡單單兩個字形容咗我這20年,Wyman真係勁。」

今次演唱會海報找來了Joey初入行20歲第一次開紅館演唱會合作過的國際知名攝影師Leslie Kee紀嘉良,Joey謂 : 「呢個合作,又係有齊PRETTY CRAZY元素!其實在去年東京睇明哥(黃耀明)演唱會個陣,突然諗起Leslie Kee紀嘉良,就即刻約咗佢出來半小時,一個下午茶咁就已經定咗係今年1月份影這輯相。因為大家工作時間關係,我只係用咗一日飛去東京,24小時crazy完成呢次海報。」

Joey續指:「影咗好似有超過12個鐘,一落機就去影相,影完就上機走。所有衫、,形象設計,都是Leslie Kee紀嘉良一手包辦,他細緻到每套衫都要我換掉指甲襯色,真係未試過如此影法。但完成作品,當然係very pretty啦,影了好多套衫,多到返來香港,單是揀相已揀了好久,張張都咁好,不知怎揀。最後經過公司所有同事投票,最終好開心揀咗我最鐘意個一張用先。之後大家重可能睇到好多唔同款海報。」

Joey找來了首次開紅館演唱會時合作過的國際知名攝影師Leslie Kee。

回想起20歲時首次舉行演唱會,Joey想起也覺得很crazy,當時她是不相信竟然有人來看自己的演唱會,「20年後今次,是我第十個紅館演唱會,crazy就交比歌迷同觀眾啦,我就負責pretty啦!」

她表示:「雖說8月才是演唱會,但我已經開始準備,keep好自己身體,準備最佳狀態,唱最好的歌,跳最正的舞給大家睇 ,希望今次不要太瘦,因為累積多年經驗,我發覺做演唱會最緊要係體力同健康,太瘦就冇營養又唔夠抵抗力去戰鬥,所以keep fit同調理身體係會同步進行,唔會比自己病。」

另外Joey又指:「我發覺現在香港人真係一年閒閒地睇十個八個演唱會,所以今次我團隊都會盡最大努力,去製作一個令大家一進場就覺得前所未有,同以往完全不同的演唱會。目的係令大家睇到我這20年的進步。究竟會點搞?要保持祕密,等觀眾入場就會知道點pretty,點 crazy !」 

此外,為了紀念20週年,Joey今次也特別邀請了五代十國設計了一個代表這二十年的logo,logo裡面以JY及20字樣,砌成了她最愛的鬱金香,演唱會會推出一系列紀念品,都會有這個logo圖案。

撰文 : TOPick柴犬出動