【安心偷食】有風度維護黃心穎 馬國明:除了Sammi無人有資格發言【有片】

娛樂 17:37 2019/04/17

分享:

馬國明現身TVB電視城回應事件。

馬國明女友黃心穎爆出偷食緋聞,黃心穎被影到與有婦之夫許志安在車廂纏綿,成為全城熱話。各位主角陸續現身就事件作出回應,馬國明今日首度現身,出言維護女友,希望大家對她高抬貴手,並指事件除了許志安太太鄭秀文外,無人有資格為此發言。

馬國明於今日四時從太古城寓所出發,約四點半現身將軍澳電視城,開拍劇集《降魔的2.0》,守候在內的大批傳媒蜂擁而上。

仍未化妝的馬明全程把頭上Cap帽拉低,估計是為了遮掩憔悴面容以及浮腫雙眼。但馬明仍然非常合作,站定讓傳媒拍攝,助手表示會讓馬明先行化妝,再接受傳媒訪問。

馬國明現身接受傳媒訪問。(攝影:MIchelle)

大約半小時後,馬明回復靚仔容貌現身,擠出笑容讓傳媒拍照,隨即接受訪問。以下是馬國明受訪全文:

其實呢件事,我知道咗之後,我好快已經冇咗嬲呢個感覺。我係好平靜,同埋我好快變成擔心,好擔心呢件事入面、任何一個人受到傷害,我都唔希望。

可能我唯一可以代表佢(黃心穎)講小小嘢,其實我知佢都知道自己做錯,我都知佢好想同大家講(對唔住),但公司擔心佢暫時情緒不穩定,擔心佢講錯嘢,所以冇安排她出嚟,我知佢啱啱出咗ig(instagram),講咗自己想講嘅嘢。

我只可以話佢其實仲好年輕,未來仲有好多路行,希望大家會畀啲空間佢,至於我,大家唔需要擔心。嚟緊我會專心工作,會繼續拍我嘅戲,唔希望影響到呢套戲進度。

至於安仔(許志安)自己都講咗嘢,安仔講咗嘢,我都唔會發表任何意見,因為我覺得呢個世界無人有資格去發言,除咗安仔嘅太太(鄭秀文)之外,大家都係無資格去發言嘅。所以我希望呢事件儘快可以去平息。

至於有媒體訪問我屋企人,希望大家高抬貴手。因為父母都唔係呢個圈嘅人,你知大家咁多位記者朋友技巧好高,好識得引導人講你想要嘅答案。

我媽咪突然間見到咁多支咪隊埋嚟,佢會驚嘅,可能會講錯咗嘢,希望大家唔好將我媽咪嘅說話係度放大,佢講過嘅任何一句說話,可能係佢好驚嘅情況之下講。

我亦都唔會就佢講嘅嘢,任何一句說話去回應大家。其實都無乜嘢再需要交代,我要講嘅就係咁多,嚟緊嘅日子我會專心做自己嘅野,多謝大家關心。唔會將呢事再發酵,令到更多人受傷害,希望呢件事盡快平息咗佢,盡快過去咗就算喇,多謝大家。

但被問到是否已跟黃心穎分手,馬明卻未有正面回應。

撰文 : TOPick柴犬出動