10歲女陰道現分泌物疑涉性侵　港急症室醫生努力查證終確診罕見病

急症室醫生經常要快速判斷病人的病徵再加以處理。近日急症室醫生長頸鹿醫生（化名）就在其Facebook專頁分享一次令他十分擔心、糾結、難處理的個案。事源一名10歲女童陰道有分泌物，照CT後確認患上主要由性接觸傳染的盆腔炎。由於女童只有10歲，萬一真的屬於性接觸傳染的盆腔炎，事件或涉及刑事，故令長頸鹿醫生十分煩惱是否需要報案。最後，醫生決定不斷翻查案例、綜合10多名專業人士意見，才真相大白。

事件全文如下：

有一日， 有個十歲左右嘅妹妹嚟睇發燒，同肚痛。父母帶佢嚟睇的，但係妹妹好叻，大部分時間係佢自己同我講嘅。喺病人入嚟之前， 大部分同事都會習慣先睇睇病人病歷，我都唔例外。跟著一睇就發覺，原來妹妹幾日前已經嚟過睇同一問題。

急症室嘅傳統智慧 ：

前輩教落，reattend case 要小心，尤其係再返嚟睇同一個病徵，因為代表個case做過一次診斷，做過一次治療都仲有同一問題，應提高警覺背後係咪有大啲嘅問題。 呢樣嘢一世受用呢～

所以大家可能會留意得到有時返嚟急症室再睇嘅case 可能會快啲有得見醫生 （因為可能分流會分類得急一啲）， 呢樣亦都體現咗「覆診」同「避免doctor shopping， 跟開一個醫生就繼續睇佢」嘅重要性。

講完小知識，繼續...

妹妹早兩日嚟睇發燒，有小小肚痛，同時間有啲傷風咳同喉嚨痛。同事檢查完無咩大問題，咁就開咗啲傷風咳藥同一隻常用嘅抗生素比妹妹食就返咗屋企。

同事已經比較穩陣， 可能見妹妹有發燒，擔心係啲比較嚴重嘅感染，所以開咗抗生素。 但係妹妹今日再次返嚟仲係發燒，但係肚痛就轉移咗去下腹。正當我聽到呢度仲諗住可能係盲腸炎嘅時候， 媽媽提到一樣之前無嘅病徵…

妹妹話佢陰道有啲分泌

咦？

以前我都提及過， 我地急症專科醫生嘅工作要做得好，其中一樣係要快速準備地做pattern recognition。有魚柳唔奇，有芝士唔奇，但係同一個包有舊KFC喺入面就好唔尋常喇。

陰道有分泌一啲都唔奇。

發燒都唔奇。下腹痛都唔奇。

但係呢幾樣加埋佢個歲數就非常奇喇。

陰道感染？ 盆腔炎？我聽到呢度， 二話不說唔會放病人走喇， 收入院檢查咗先。

媽媽呀，聽啲病徵似係一啲婦科問題， 不過呢個歲數絕少有咁嘅情況， 我地住院檢查清楚先

醫生心裡有一定嘅諗法， 但係睇埋檢查結果先， 萬一照出嚟原來唔係婦科問題就嚇親人。

喺醫學上，好多時醫生講某一啲字眼，其實就已經有一啲 implication （潛台詞/暗示）。例如若果一個小BB我地發現佢無端白事背部肋骨折斷，我地其實就imply 咗可能呢個case係虐兒。

同樣道理，一聽到呢個歲數有發燒加陰道分泌，長頸鹿其實就已經轉向去咗婦科感染。問題係，女性嘅陰道 suppose好乾淨，唔會有菌 （自身嘅良性菌除外）， 處女更甚。一般我地話得盤腔炎，基本上都imply感染嘅途徑係…性接觸。即係性病！

而以呢個妹妹嘅歲數， 就唔係性病咁簡單！係一個serious crime，potential criminal case！

所以難搞呀～背後仲牽涉好多問題。我心係咁諗，但係當然唔想嚇親屋企人啦，入咗院先算。但係其實我當晚用藥已經係打緊一啲主力醫盤腔炎嘅抗生素…

不幸地第二朝一早比電話嘈醒…

長頸鹿醫生？ 我係放射科XXX醫生呀，喂你有個10幾歲嘅case啱啱照咗CT呢…

PID （盤腔炎，pelvic inflammatory disease） 吖嘛？

係囉， 兩邊輸卵管積水喎， 我好難唔話佢係PID喎，無乜其他可能性喇喎……但係咁嘅歲數…

明呀...係呀， 我expect都係照到啲咁嘅嘢嘅，希望唔係啫點知落空咗。唔該你先

呢個情形真係好棘手。

因為若果醫生喺佢專業工作期間，發現到嚴重罪案嘅話，無論係as 一個好市民定係醫生嘅身份都好，都係要即刻報警的 （因為你永遠唔知對方係邊個，could be anyone，包括父母）。

但係…呢個係好困難嘅決定。一旦bypass咗所有人報警，其實係要百分之百肯定無其他可能性先最理想，若果唔係，你會想像得到有幾大件事。可能會有人話醫生屈人強姦啦。父母可能話個醫生癡線啦咁話自己個女搞三搞四告你亂報警侵犯私隱whatever啦…等等。

所以，剩返嘅問題就係，有無可能係處女有盤腔炎呢？呢樣真係唔敢講，我諗就算有，可能一個醫生一世人都未必遇到一個！呢次不敢怠慢，因為真係大件事同埋醫生個decision 好緊要。

集體意見先。

問咗同事意見，十個有九個半一聽都係話非常大機會係

• 性病🙋‍♂️
• 報警🙋‍♂️
• 搵定法醫驗🙋‍♂️

非常好，証明我地嘅medical training 係幾咁正統同一致咁高水準，個個醫生train到呢啲水平大家個標準都好接近。

不過，我自己都當然一定要好努力搵下有無案例啦。 因為今次好緊要，若果我真係搵唔到一個single case report 處女PID， 咁我真係唔理就即刻報警㗎喇，我無得選擇。

哈，又比我同另一位同事搵到喎（就係之前第一次睇妹妹嘅同事，亦要多謝佢呢~）

原來喺外國有啲研究都發現最高有成 4%嘅PID case係處女嚟。

好喇，集齊資料，就嗱嗱臨同屋企人同妹妹講啦～

首先病人係minor（未成年），都同咗爸爸媽媽單獨傾咗先。

我將所有嘅可能性都同爸爸媽媽講咗先。包括一般情況下盤腔炎係點嚟， 點傳染，喺呢個歲數診斷到盤腔炎會imply係咩意思等等…

非常感謝妹妹嘅父母好明白事理，佢地well educated，完全明白我所講嘅嘢，亦知道可以有幾大件事。（我絕對相信有一啲父母一聽到可能真係會癲咗， 不過佢地一啲都無）。

下一步我就提到醫生加父母一齊explore下有無真係發生過啲咩事。由於大家都估估下，所以我地都各自各喺唔同時間單獨訪問下妹妹。

我自己睇妹妹啲反應非常咁正常，乖乖女咁樣，亦都好醒自己講到有咩唔舒服，well educated 講嘢好有sense。對男性嘅互動，睇症檢查傾計亦無唔正常嘅反應。

之後隔咗日又訪問下爸爸媽媽， 佢地亦自己分別同妹妹單獨傾過計，都真係唔覺有咩異常。返學放學亦有工人睇住，父母自己感覺對咗妹妹咁多年佢地都覺得妹妹好乖，妹妹亦好信任父母，有咩事都應該真係會出聲，亦無跡象拍拖…等等。所以去到最尾，大家傾得清楚，我地所有人互相信任大家，就唔報警喇。

臨床診斷為罕有處女盤腔炎。

我將個case pass咗比婦科醫生再做進一步檢查同治療， 過多兩日就退咗燒出咗院了。Again，醫生唔係神。喺呢個case我永遠唔會100%肯定真相係咩。去到最尾，呢個世界上得妹妹自己先知發生咩事。不過醫生會盡最大努力用佢嘅專業知識守護病人，幫助病人。

處理呢啲事，你唔好話我聽又走去google自己搵資料呀， 嚇死無命賠㗎。

電視成日講嗰句 「尋求專業人士意見」唔係聽完就算㗎。

我喺呢個case都搵咗另外10個以上嘅專業人士意見呢。

文章獲「問問Dr Friend - 長頸鹿醫生」授權轉載。