父母過分保護降低孩子抗逆力 陳淑蘭:愛佢變成害佢

親子 18:22 2019/05/30

分享:

陳淑蘭指︰「時代唔同,小孩的養育方式都矜貴咗好多。」

周圍人叫我做「蘭子」。契仔叫我做「媽子」;我契仔生咗仔,我又多了一個新稱呼,叫「嫲子」!即係話,我抱孫了!

我將抱孫相發上社交平台,好多朋友都在評語揶揄叫我自己生番一個,多謝大家咁睇得起我,覺得我還有這方面的能力,基本上我應該連暗瘡都生唔出了。就算給我真的生到BB,體力都應該會透支。

而家抱下孫仔十分鐘唔夠,已攰到即刻要放低佢,兼且除了身體吃力,心理上也有壓力。

BB未出世,已經要搵定學校,擔心這樣那樣,絕對不適合我這個緊張大師。所以玩別人的小孩就最好,不用上身!

我去探契孫時,契仔要我戴口罩,洗手要洗埋手臂,說話要細細聲。我問契仔的爸爸︰「你嗰時生佢有無咁緊張?」他答︰「梗係無啦。」所以時代唔同,小孩的養育方式都矜貴咗好多。

我有個朋友生咗BB,屋企每幾米放一個空氣淨化機,分分鐘乾淨過醫院的手術室,但佢個仔每次出完街都病。梗係啦,過分保護到咁,不食人間煙火,邊有抗體對抗屋外的細菌?咁咪愛佢變成害咗個小朋友囉。我可以咁口響批評人哋鬼咁緊張,因為個仔係人哋嘅,所以我淨係負責喺度指指點點咁風涼。

記得幾十年前有一天,同曾華倩和鄧梓峰,睇見隔籬枱有幾個嘈喧巴閉、好曳嘅細路,我哋十分厭惡,原來佢哋都係同我一樣唔鍾意細路的人。但世事無絕對,當佢哋有自己骨肉時,緊張程度真係始料不及,所以如果我有機會老蚌生珠,自己都唔敢諗會有幾肉緊!

我阿媽40幾歲生我,到而家仍擔心我過馬路畀車撞到、一個人去旅行會畀壞人拐走、買西瓜會攞唔穩跌落腳度整親……她的過分呵護,造就了今時今日的我,同家陣好多被寵壞的細路一樣,好多嘢都唔識做,淨係得把口!

全文刊於《晴報》

撰文 : 陳淑蘭