【反送中】無綫電視記者採訪遭阻礙　TVB前線記者向林日曦剖白：防守新聞價值

《逃犯條例》引起社會連串風波，TVB新聞更被指出沒有報道真相。《100毛》毛記葵涌創辦人林日曦今日（6月29日）在facebook專頁發帖，分享在TVB新聞部工作朋友的看法。

這位TVB的前線記者就連日來《逃犯條例》的引發的事件作出己見，指前線記者都堅守新聞價值，希望在自己的崗位上為香港做一點事，奈何報道經修改，作為前線記者只可以「盡做」，盡力防守新聞價值。

作為新聞工作者，就算我哋有咩理由抗辯，我哋明白，最後出嚟嘅新聞，我哋都有份。我哋亦都明白，好多我哋嘅報道，寫法偏頗。你哋嬲，激氣，係合情合理。甚至我哋私下，都會希望大家鬧，最好鬧到我哋嘅高層知驚。

可惜，高層永遠唔會覺得自己錯。袁志偉根本唔在意你哋嘅聲音，唔會覺得自己有問題。甚至佢會刊出投訴數字，然後表示好多人投訴我哋偏幫示威者。係呀，係好荒謬，好痴線。呢個就係高層嘅世界，佢自己創造咗一個平行時空。

▲ TVB的前線記者表示自己絕對相信新聞自由。（資料圖片）

作為記者絕對明白和支持新聞自由：

新聞製作，前線記者同攝影只係佔一部分，仲要經過寫稿、剪輯、做VO、採主Check片等等工序先出到街。簡單講，喺現場做緊嘅前線同事控制唔到條稿點寫，甚至做VO嘅同事，都未必真係講緊自己想講嘅嘢。

 

我可以好肯定咁講，我哋前線記者，絕對支持新聞自由，支持普世價值，新聞原則。採訪現場，我哋唔會，亦都唔會容許自己偏幫任何一方。我哋可以做嘅，只係將真實報返去。最後報道出街變晒樣，我哋都唔想，甚至我哋都好嬲，因為我哋出樣、出聲、出名，出到街，就變咗係自己嘅報道。

每個前線人員都竭盡所能捕捉當日畫面：

▲ 《逃犯條例》引起不少民眾活動表達不滿。( 車耀開攝)

咁TVB仲有冇存在意義呢？其實我仲係覺得有。而家呢個係開Live嘅時代，多幾部Cam開Live，其實真係記錄到多一點事實。例如今次射頭，警察掟鐵支等等，其實我哋嘅攝影師都捕捉到，Live已經出晒街，亦有網民Cap到圖。至少，我哋成功記錄咗事實。

 

同埋，關於話我哋冇用啲片，事實上係我哋內部非常混亂，612當日海量直播片傳返公司，人手上或方法上都冇好好組織點去Mark低啲重點片段，其實能做嘅，我哋都盡量做。之後組織返，我哋都盡量出返。TVB係大台，但內部真係好混亂，指揮調配真係好差。

這位記者認為自己在公司很卑微，即使意見不一，不能說走便走：

有人話，做TVB就係共犯，有良知應該辭職。首先我想講一句唔好聽嘅，我哋都要生活，係好卑微，但呢個係事實，我唔會否認，好多同事屋企一家大細，真係唔可以話走就走。同時我哋都會諗，我哋堅守工作崗位，盡力把事實全部記錄低，點解最尾我會被逼到生計無埋、飯都冇得食？點解唔係坐喺房入面嗰啲人去承受？

 

仲有一點係，呢個平台真係有影響力，就算大家唔開電視，茶記都日日播，商場，醫院又會播，你點都會吸收到我哋嘅新聞。大多數同事都係堅守新聞原則，問心，我哋都有出過一啲公道嘅故仔，或者至少，我哋可以令件事唔好去到咁極端。如果我哋真係走晒，佢再換一批更易控制嘅，就會連最後少少平衡都打破埋。

我哋一直都提自己，可以做嘅，盡做。

事件令到同事們心情低落，外出工作遭受阻礙，希望大家能夠體諒：

▲ 有示威者在律政中心外示威時，用電筒近距離照射無綫電視新聞部記者眼睛，妨礙其正常採訪工作。（梁偉榮攝）

呢幾日，已經去到一個，每位同事都好灰、好唔開心嘅地步，我先會咁樣講出嚟。之前有人喺網上將一班同事起底，我哋都好擔心。見到前線一直好努力嘅攝影同事，被攻擊同辱罵，更加係痛心。我哋都有喺崗位上，盡力為香港做事。或者我哋可以做嘅，只係防守，防守新聞價值，但我哋都真係有努力。

 

真心希望，大家唔好搞出去採訪嘅同事。行出去，畀大家鬧，返到去，再對住呢班老細，我哋真係好辛苦好大壓力，希望大家體諒。同埋希望大家唔好起底，真的。如果喺現場，你覺得我哋（或任何記者）有違反新聞操守嘅行為，即管質疑，但希望大家真係唔好見到TVB就圍。

 

大家盡量Cap低所有失實、偏頗嘅報道，然後去投訴。記得，通管局其實冇咩能力去判斷新聞，所以請同時寄埋去TVB對外事務部，我仲係相信，作為一個商營機構，群眾力量夠大嘅，佢好難置諸不理。新聞部，都係成間公司其中一個部門。

 

同埋，希望大家接受，TVB真係大台，大家點鬧都好，好多中老年人，都真係靠TVB吸收資訊。或者可以試下，同長輩們分析下，或者見到公道嘅故仔就叫佢望多兩眼。佢哋信任TVB，我哋都可以利用呢一點。

 

最後我想講，我唔係叫大家唔好再鬧，大家應該鬧，甚至有行動（例如投訴）但希望大家可以明白我哋前線嘅情況，容許我哋同大家一齊努力。

 

做到幾多得幾多，請相信我哋。多謝大家。