【進擊大媽】不滿停泊1分鐘被鎖車 拖鞋大媽激戰第一城鎖車隊:你蝦人!

精明消費 11:13 2019/07/16

分享:

沙田第一城屋苑內有鎖車隊,每當車主違例泊車鎖車隊就會極速鎖車,車主需付解鎖費320元才可放行。近日一名鄉音大媽車主遇上鎖車隊,大媽聲稱只停泊一分鐘即被極速鎖車,於是她軟硬兼施希望鎖車隊破例放行,影片上傳至網絡後引來一眾網民熱議。

有網民在 Facebook 群組「馬路的事討論區」上載影片,片中一名身穿粉紅色連身長裙、著拖鞋的大媽,一邊手夾著順豐快遞包裹,一邊用雙手扯著反光衣鎖車隊人員不肯放行。大媽以略帶口音的廣東話大鬧鎖車隊人員,指自己只是去順豐取包裹,已很快回到車旁,但二人「一分鐘你都鎖」,於是求二人「通融吓」希望可以解鎖。

不過兩名鎖車隊人員都只是不斷重複「無架喇,有咩去返保安講」,又強調鎖車後他們都無法解鎖。但鎖車隊人員的回答令大媽更嬲,大媽於是怒斥「我企係到你都鎖,你蝦人」,更一邊說一邊狂扯其中一名鎖車隊人員的衫,他只好無奈地說「(件衫)爛喇...」大媽於是嬲爆稱「爛我咪賠返畀你囉!」

最後鎖車隊人員的決定報警,影片到此便終結,未知最後鎖車隊人員有否解鎖。

據「沙田第一城2015年工作報告」顯示,該管理公司自2014年7月起,安排兩間鎖車公司於屋苑私家道路巡邏,並扣鎖違例停泊車輛。報告指出,2015年屋苑內被扣鎖的違例停泊車輛總數有3,831架,以每架鎖車的開鎖費為320元,估計該年有最少逾122萬元相關收入。及後有傳媒向管業處查詢,得知管業處短短3年間收入至少370萬元。

以下為大媽與第一城鎖車隊影片中完整對話:

大媽:你咁樣鎖就唔啱啦嘛...係唔係呀?你話長時間都話,一分鐘你都鎖。你影吖你影吖無所謂。一分鐘攞順豐嘅嘢,又唔係第一次係到攞,你通融吓架嘛...通融吓架嘛,真係一分鐘架咋。

大媽:你頭先未鎖個時我已經落咗嚟架喇,你話畀一兩分鐘時間人哋走架嘛,係唔係呀?完全一分鐘都唔畀,咁你係唔係過分得濟呀?我見到你鎖個陣我已經企係到。

鎖車隊:無架喇,有咩疑問去返保安到講啦。

大媽:你幫我開咗鎖先...

鎖車隊:X你老X,過個邊講呀!

鎖車隊:唔好唔好,無架喇,開唔到,去返寫字樓講,鎖咗就開唔到架喇

大媽:我企係到你都鎖,你話我唔係到就話啫。

鎖車隊:爛喇...!

大媽:宜家我落咗嚟喇你都要鎖。你宜家過分得濟呀...你蝦人。你蝦人。你蝦人。

鎖車隊:無得講喇,去41座個到講。

大媽:你影吖你影吖,大不了報警架啫,話我打佢。你話我時間長就話啫,一分鐘時間,啱啱入咗去前面一個排隊都無,而且我落咗嚟,你鎖緊見到我都唔鬆手。會唔會過分得濟?

鎖車隊:爛喇...!

大媽:你話我唔係架車隔離,停架車十幾分鐘以上,你鎖我無所謂,我企咗係架車隔離,你都要鎖。

鎖車隊:有咩去保安講...

大媽:我知道你哋要搵食,一個係幾百蚊,咁你哋咁樣唔啱架嘛,要睇人時間長同埋短架嘛,係唔係呀?

鎖車隊:爛喇...

大媽:爛喇?我賠返件衫俾你!所以你哋真係好過分呀!

鎖車隊:無喇,去保安到講啦。爛喇...

大媽:爛我咪賠返畀你囉!

鎖車隊:過個邊講啦...

大媽:大家都要講吓理架嘛!我企咗係旁邊你都要鎖。如果警察抄牌呀,見到人係到都畀人行啦,我企咗係架車隔離你都照鎖,係咪唔啱吖?

鎖車隊:我個塔鎖咗喇,無得講喇...你扯爛我件衫都無用...

大媽:扯爛你件衫我咪賠囉!我啱啱都係到,入咗去就出咗嚟,咁都鎖唔畀我走,係咪離譜得濟呀?順豐入面嘅人都可以做證!

鎖車隊:無架喇,無架喇,過個邊講...

大媽:唔畀人走,太過分喇...你哋蝦人!

鎖車隊:鎖咗就無得講喇,去41座保安部講啦...唉報警啦報警啦...