沒有無緣無故的仇恨 曾智華:元朗襲擊有良知的必定義憤填膺

休閒 13:16 2019/08/01

分享:

曾智華指,只要有看過《鏗鏘集》重組721元朗黑夜重組片段的市民,有少少良知,必定義憤填膺!

沒有無緣無故的仇恨,也沒有無緣無故的支持或撑撑撑!

周一開始,我肥碌手機彈出數以百計朋友問:「睇咗《鏗鏘集》未?」更有十數位將片直接傳過來。

小弟都想問問大家:「你有無睇過呢?」

睇過的任何香港人,只要有少少良知,必定義憤填膺!

香港三萬各級現役警員,再加萬多退役警員及數以十萬計家屬,也應平心靜氣看一次。看完之後,有甚麼感覺呢?能夠釋然嗎?

「七二一元朗襲擊」事件,《鏗鏘集》團隊很冷靜,不辭勞苦搜羅附近所有閉路電視片段,重組當日幾時(下午六點幾)白衫人出現,手持甚麼武器,在哪條街哪個位聚集。然後,幾時有市民開始不斷報警(下午六點幾),直至當晚深夜,警方九九九台的反應態度等,全部有齊。片段見到幾次警車巡經手持武器擺明在非法集結者時,竟然不作理會駛離。

其實,除咗警方情報組突然「傻咗盲咗聾咗」外,大量市民根本在七月二十一日下午之前,已收到元朗區有人要「做嘢」、「打仔」、「吹大雞」的信息。

之後發生乜事,大家都知,毋須再複述了。白衣人明目張膽血腥襲擊無辜市民,不少根本口罩都唔戴,擺明未驚過會俾人拉,故囂張地以真面目上鏡。

「一哥」盧偉聰究竟有無睇《鏗鏘集》呢?睇完,再回顧自己在記者會上大大聲講與黑社會「誓不兩立」,會否覺得好尷尬、水洗唔清、無地自容呢?

To Protect and To Serve的誓言,如今何在?

撰文 : 曾智華