【容祖兒演唱會】伊健Joey的友情歲月　祖兒難忘羅文教誨成就天后路

鄭伊健容祖兒是最好的同門師兄妹。同樣得到師傅羅文老師的傳承，將正能量傳播。昨日，伴隨鄭伊健到紅館擔任《PRETTY CRAZY JOEY YUNG CONCERT TOUR容祖兒演唱會》第二場的嘉賓。我們早到了，伊健靜靜坐在一旁看著祖兒綵排，說不要騷擾師妹，讓她專心排舞。

當祖兒發現他時，興奮地跑過來說：「多謝你呀！其實頭先成段舞都冇喺呢個台綵排過，因為有一日八號風球停咗工，前晚個舞台未準備好，噚晚機關壞咗，所以啱啱先試第一次......今晚希望順順利利，我會盡力的！」

伊健安慰她說就算台上所有東西混亂了，也不要混亂自己的思緒。當師兄妹認真綵排時，張敬軒突然出現眼前，笑說自己來幫祖兒試咪，一個心地善良的小伙子，一切在心中。

▲ (圖片：EEG）

常說擁有相同能量的人會互相吸引，互相影響。

欣賞祖兒開騷時，充滿正能量笑容滿面的告訴萬多位觀眾說：「歡迎大家來到Pretty Crazy......應該講係第二場定點呢？噚晚嗰場你哋無睇真係嘥晒，特別場嚟㗎！我都未試過喺紅館齋唱歌、淨係跳咗少少舞就收工喇，最奇怪係所有觀眾都睇得好開心，聽到佢哋話咁樣已經值9百幾蚊，甚至乎山頂的朋友都話好正呀！」

祖兒坐吊車懸掛半空時，看見Pannel位上的張敬軒，即要求對方合唱《我的驕傲》，還說：「I love you！多謝你張敬軒，佢除咗做火龍果，平時都好好，我呢支咪、呢個耳機可以唱得咁舒服，都係因為佢早過我哋到紅館，幫我哋set好晒成套嘢先，我未見過咁好嘅人，大家比啲掌聲佢，大家知佢幾忙呀？又要開餐廳，又要自己開演唱會，都嚟幫我，好啦！我俾火龍果一個機會，搵晚做嘉賓啦！」真心感動。

到伊健與祖兒合唱《一生愛你一個》時，二人先來個擁抱，祖兒笑說：「多謝晒，大家比啲掌聲 我大佬！」伊健笑說：「我唔係你大佬，係你師兄啫，大家知唔知點解我會嚟做嘉賓呀？(祖兒問係咪因為我靚呀？)呢樣唔使講啦，但仲有個原因我估大家唔係咁清楚，就係我哋係同門師兄妹，我哋係羅文嘅徒弟，有羅記獅子山下嘅精神。因為我哋嘅老師令我哋可以喺樂壇、演藝事業繼續做落去，因為有佢嘅教導同埋精神。」

▲ （圖片：EEG）

祖兒說：「記得師傅同我講過，無論喺個舞台上有幾多人睇你或者幾少人睇你都好，你都要覺得你就係呢個舞台嘅主持人，所以我噚晚有啲迷惘嘅時候，我腦海係諗住佢，如果係佢又會點樣處理呢？雖然佢已經唔喺我哋身邊好耐，但佢嘅精神永遠長存。」伊健說：「仲有係佢帶比我哋嘅能量，我希望同大家分享，有無興趣接收呀。」

二人合唱羅文快歌《在我生命裏》，祖兒說要送比天上嘅老師，讓大愛包圍紅館。

伊健落台後，隨即跑上舞台觀眾席的樓梯，欣賞好兄弟錢嘉樂的錢家班廿多名的動作特技演員與雜技團的精彩空中肢體動作演出，看得目瞪口呆。

原來大愛是最大的能量。昨晚帶著滿滿的正能量回家，好好睡了一覺。