前警員王喜恐怕警方非常手段遺禍深 勸回頭是岸:仲嚟得切

娛樂 10:03 2019/08/12

分享:

過去兩個月因《逃犯條例》修訂引發多場示威,於昨晚(8月11日)在香港多區發生多宗衝突,有人受傷。曾任職警員的藝人王喜於事發前已在個人facebook發文,以「外傭」作比喻「白衣人」,並呼籲警方停止使用「非常手段」、回頭是岸。

發文以幾幢大廈的相片為的配圖,相信寓意家庭。

王喜的長文以香港的藍天作配圖。(Facebook圖片)

其實,身為前警務人員的王喜一直關注反修例運動,曾多次以其前警員身份發文。在8月11日的傍晚7時、警方武力升級前,王喜在他的facebook撰文的全文如下:

請外傭唔係唔得,不過佢哋攪禍咗你屋企後,拍吓蘿柚就返祖家,最後咪又係你住喺間爛屋。

咪同我講係你奶奶逼你請佢,唔關你事吖。唔信你又試吓攞張單畀你奶奶,睇吓佢肯唔肯找數吖。

你話非常時期要用非常手段,宜家連非法手段都用埋,有效咩?呢個無錯係非常時期,但唔會一世㗎,總有一日會完,回復正常時期後,非法手段用慣手勢戒唔甩,就抱憾終生㗎喇。

到時,就係你親自食番個果報嘅時候。

法律制裁到,就叫做自作自受,心甘命抵,與人無尤。

被因果法則制裁你,就唔一定係自受㗎。

收工嘅時候,用你自己條毛巾,响枝警棍上面由頭捽落尾,睇吓上面嘅血跡,再望吓你個帽徽。

宜家拒絕果堆不合法命令,仲嚟得切。舉頭三尺係有神靈,警匪警匪,唔係警就匪,二揀一,回頭是岸啊,伙記!

發文不足半日已獲上千個轉發、近萬個讚好,網民大讚王喜是「良心藝人」,感謝他為香港人發表肺腑之言。

撰文 : TOPick柴犬出動